Berlin (dpa/SN). Nic jenož politikarjo SPD a zastupnicy socialnych zwjazkow kriti­zuja póndźelniše wuprajenje zwjazkoweho kanclera Friedricha Merza (CDU) na lětnym přijeću Zwjazka němskich bankow, zo budźe zakonska renta w přichodźe jenož hišće zakładne zawěsćenje za wuměnk. Tež durinski ministerski prezident Mario Voigt (CDU) je wčera w magacinje Stern na to skedźbnił, zo je zakonska renta runje za ludźi we wuchodnych zwjazkowych krajach eksistencielna. Tam nimaja financielnych móžnosćow, so přidatnje zawěsćić, wón wuzběhny. Trěbny je wuwaženy miks reformow. „Dźe wo to, zo zakonsku rentu skrućamy a zdobom přidatne móžnosće zawěsćenja za starobu skićimy“. Předsyda frakcije SPD Matthias Miersch podšmórny, zo zakonska renta socialna pomoc njeje, „ale zo hódnoćimy z wupłaćenjom žiwjenski wukon ludźi w našim kraju“. Jednaćel frakcije SPD Dirk Wiese wuzběhny, zo dyrbja so ludźo na zakonsku rentu spušćeć móc, kotruž su sej ze swójskim dźěłom ­nadźěłali.