Budyšin (SN/bn). We wobłuku zarjadowanjow na česć a wopominanje dr. Marje Grólmusec wuhotowaštej župa „Jan Arnošt Smoler“ a Zwjazk dźěłarnistwow Němskeje (DGB) minjenu sobotu hudźbno-literarne popołdnjo w Budyskim Serbskim domje. Zdobom spominachu na nim na Marju Kubašec składnostnje jeje 50. posmjertninow. Zazběh tworješe prapremjerna prezentacija wideja rjadu Stawiznak­, z kotrymž towarstwo Serbska murja na žortne wašnje prěnje powołanske kročele Marje Kubašec prěnjeje serbskeje wučerki „w konserwatiwnych Chrósćicach“, zwobraznja. Klip šwika přede­wšěm muži, kotřiž žonam „wyše nadawki“ njepřicpěwaju. Tele nastajenje kaž tež po- resp. wustupowanje přećiwo njemu twori po słowach županki Lenki Thomasoweje paralelu mjez woběmaj žonomaj. Za Kubašec bě to jedna z přičinow, so čas žiwjenja z dóńtom serbsko-katolskeje publicistki a socialistiskeje spjećowarki přećiwo nacionalsocialistiskemu režimej zaběrać. Drje najznaćiši wuslědk toho je jeje w lěće 1960 wušła biografija „Hwězdy nad bjezdnom“, kotraž steješe w srjedźišću literarneho dźěla zarjadowanja.