Krawny njeskutk jima zjawnosć a bjezposrědnje potrjechenych

Lipsk (dpa/SN/MG/hn/jp). Při amokowej jězbje w nutřkownym měsće Lipska stej wčera, póndźelu, znajmjeńša dwě wosobje swoje žiwjenje přisadźiłoj. Tři dalše wosoby so ćežko zranichu. Wokoło 16.45 hodź. je 33lětny amokowy šofer ze swojim awtom po Grimmaskej dróze jěł a při tym tójšto ludźi zranił. Dokładne ličby potrjechenych dotal znate njejsu, policija trochuje jich na něhdźe 80. Amokowc kaž tež smjertnej woporaj su němscy staćenjo. Skućićel bydleše blisko Lipska.

Policija tuchwilu z toho njewuchadźa, zo měješe skućićel politiski abo nabožny motiw. Sakski nutřkowny minister Armin Schuster (CDU) rjekny na nowinarskej konferency wčera wječor, zo je šofer pječa sam jednał a zo je z tym amokowc. Powěsćernja dpa rozprawja, zo drje bě muž policiji hižo do toho znaty, nic pak podobnych deliktow dla. Jemu wumjetuja nětko mordarstwo w dwěmaj padomaj a pospyt mordarstwa w znajmjeńša dwěmaj padomaj. Dźensa ma so chłostanski sudnik z podawkom zaběrać.