Załožbowa rada po přepodaću finančneho zrěčenja wuradźowała
Drježdźany/Budyšin (SN/mb). Zdokonjane je: Pjate dojednanje wo financowanju Załožby za serbski lud za lěta 2026 do 2030 je wot Zwjazka, Sakskeje a Braniborskeje podpisane a bu załožbje wčera oficialnje w sakskim statnym ministerstwje za wědomosć, kulturu a turizm přepodate. Z tym zwyši so cyłkowne spěchowanje lětsa na něhdźe 29,3 miliony eurow. Pjenjezydawarjo rozdźěla sej tutu sumu tak kaž dotal (Zwjazk: 14,628 mio. eurow, to je 50 procentow; Sakska: 9,752 mio., 33,33 proc. a Braniborska: 4,876 mio., 16,67 proc. Kaž direktor załožby Jan Budar informowaše, je to porno 2025 drje zwyšenje přiražki wo 5,34 mio. (wot 23,916 mio.), ale praktisce njeje skok tak wulki. Wšako bě załožba 2024/25 stupace wudawki z rezerwy financowała, kotruž je w lětach 2020 do 2023 nahromadźiła. Jeničce loni bě tomu 4,8 mio. eurow.
Facit załožboweho direktora: „Skerje je zwyšenje přiražki to, štož trjebamy za dalewjedźenje tuchwilnych strukturow, bjez toho zo dyrbimy ludźi pušćić. Zo by to tež w přichodźe tak było, wobkedźbuje finančne zrěčenje stopnjowanje přiražkow po 2026 wo lětnje tři procenty. Nětko mamy wěstotu za planowanje hač do 2030.“
