Nowinarstwo mjeńšinow w Europje: La Usc di Ladins a Serbske Nowiny

Na lětušim kongresu Europskeho zjednoćenstwa dźenikow mjeńšinowych a regionalnych rěčow (MIDAS) minjeny kónc tydźenja w Bozenje su čłonojo organizacije ladinsku nowinu La Usc di Ladins­ do swojich rjadow přiwzali. Ladinjenjo a Serbja maja samsne zakładne wuměnjenja. Ludaj nimatej „maćerny kraj“ a matej jenož mało rěčnikow. To je hladajo na wuwiće w nowinarstwje wulke wužadanje, dokelž njemóžetej mjez druhim kumštnu inteligencu a wšelake z tym zwisowace móžnosće tak zasadźeć, kaž to druhe medije hižo činja.