Prěnja encyklika bamža Leja XIV. „Magnifica humanitas“ wozjewjena

Rom (dpa/SN). Bamž Leo XIV. je sej w swojej prěnjej encyklice krute mjezynarodne předpisy za wobchad z kumštnej inteligencu žadał. Po lěće w zastojnstwje warnowaše ponitfeks něhdźe 1,4 miliardow katolikow na swěće před mnohimi strachami, kotrež móhła nowa rewolucionarna technologija zawinować. Zdobom pak widźi tež šansy. Wjace hač sto stron wopřijimacy spis ma titul „Magnifica Humanitas“ (wulkotne čłowjestwo).

Prěni rozwučowanski spis pontifikata noweho bamža pohódnoćeja eksperća často kaž wozjewjenje knježerstwa. Tajke „wokolniki“ – tak posłowny woznam słowa encyklika – maja wěriwym po wšěm swěće moraliski kompas być. Titul encykliki móže dwoje wěcy woznamjenić: Humanitas hodźi so zdobom jako „čłowjestwo“, ale tež jako „čłowjeskosć“ přełožować, štož ma ­Leo za wulki rozdźěl k mašinam a ke KI. W podrjadce ency­kliki steji: „Wo zachowanju čłowjeka we wěku kumštneje inteligency“. Tekst wob­jednawa nimo toho tež temy kaž wójnu a měr abo swět dźěła.