Němsko-Serbske ludowe dźiwadło Budyšin spomina na swojeho čłona Křesćana Barta, kiž je 15. meje w Hamburgu w starobje 91 lět zemrěł. 4. julija 1934 rodźeny w Delnim Wujězdźe je Křesćan Bart trojorěčnje wotrostł. Swoju maturu złoži na gymnaziju we Warnoćicach. Swoju lubosć k dźiwadłu je sej na zažnych wopytach dźiwadła wotkrył. K tomu přinošowaše tež jeho nan, kiž bě aktiwny hrajer lajskeje dźiwadłoweje skupiny. Wot toho časa postajowaše hraće na jewišću žiwjenje Barta. W lěće 1948 słušeše wón do kruha załožerjow Serbskeho dźiwadła w Budyšinje.
Po swojim studiju slawistiki w Lipsku je Křesćan Bart jako asistent za režiju a dramaturgiju pod intendantom Janom Krawcom w Budyskim dźiwadle skutkował. Wot hrajneje doby 1958/1959 hač do 2004/2005 bě wón kruty ansamblowc Němsko-Serbskeho ludoweho dźiwadła w Budyšinje. 1961 złoži swoje činohrajne pruwowanje. Hišće hač do poslednjeho předstajenja „Olsenoweje cwólby“ w lěće 2018 skutkowaše wón jako hósć na jewišću a tak jako najstarši (hósć) dźiwadźelnik domu.
