Drježdźany (dpa/SN). Truskalcy w Sakskej pospochi dozrawja. Na spočatku sezony žnjeća su sadowi burja optimistiscy. „Na terenje našeho zwjazka plahujemy na něhdźe 175 hektarach truskalcy a wočakujemy dobre žně z dobrej kwalitu we wobjimje něhdźe 1 400 tonow“, rjekny předsyda zwjazka sakskich sadowych burow Jörg Geitel w Žitawje. „Nětko prawje započinamy.“ Geitel pak přizna, zo su zmjerzki po nocach kónc apryla ­něšto škodow naparali. Tole drje budźe so trochu na žně wuskutkować, nic pak přejara. Na wikach tuchwilu dosć truskalcow wotbywaja. „Dotal bě hišće mało němskich tworow na wikach. We wobchodach na statokach pak je mało konkurency z europskeho susodstwa.“ Tole je w kupnicach hinak, wšako tłóča tam wosebje truskalcy z Pólskeje a Španiskeje płaćizny. Geitel so nimo toho wo přichodźe plahowanja truskalcow w Němskej wupraji. Burja so wo to prócuja, sad tež dale tu plahować móc. Mnohich reglementacijow pak je tole dźeń a ćeše. Wosebje mzdy su wulke financielne wužadanje, wšako dyrbja zawody zdźěla 50 do 60 procentow swojich dochodow za nje nałožować.