Marko Šiman z předewzaćelemi w Berlinje: Šlinkowe tempo njedosaha

Budyšin/Berlin (SN/mb). Wšón swět rěči tuchwilu wo změnje strukturow – Marko Šiman rěči wo infrastrukturje, wšako serbski zapósłanc CDU w sakskim krajnym sejmje wě: Bjez njeje wuwiće regiona na hračkach steji. Zawčerawšim poby Šiman z pjeć zastupjerjemi Hornjołužiskeje iniciatiwy w stolicy Němskeje, zo bychu w zarjedźe zwjazkoweho kanclera zajimy Hornjeje Łužicy zwuraznili. Zaměr tuteje w lěće 2010 załoženeje iniciatiwy, kotrejž 30 zawodow wšelakich branšow a rozdźělneje wulkosće přisłuša, njeje jenož stajny angažement za dobre hospodarske wuwiće, ale nachwatanje standarda, kotryž bu wuchodej po přewróće 1989/90 slubjeny.