Budyšin (CS/SN). Njewšědnje wjele připosłucharjow běše so minjeny pjatk wječor w tachantskej cyrkwi na Budysku narěč zešło. To njezadźiwa, wšako referowaše Carlo Masala, w Němskej derje znaty politiski wědomostnik a profesor za mjezynarodnu politiku na Mnichowskej uniwersiće Zwjazkoweje wobory. Něhdźe 400 zajimcow chcyše wjace wo jeho rozmyslowanjach k temje „By-li Ruska dobyła“ zhonić.
Smy w času boja wo nowy swětowy porjad žiwi. A w konflikće w Ukrainje dźe wo nowy swětowy porjad, rěčnik wuzběhny. Wosebje tak mjenowane BRICS-staty – to je zwjazkarstwo wliwapołnych statow Brazilskeje, Ruskeje, Indiskeje, Chiny a Južneje Afriki – tutón nowy porjad přihotuja. Mjez druhim su nowy swójski system płaćenja z nowej měnu zawjedli, kotryž aziska wuwićowa banka zaruča. Cil zwjazkarstwa je, zapadnym industrijnym narodam móc sćazać.
