Berlin (dpa/SN). Rozprawu wo kriminaliće z politiskim pozadkom w lěće 2025 je zwjazkowy nutřkowny minister Alexander Dobrindt (CSU) wčera zhromadnje z prezidentom Zwjazkoweho kriminal­neho zarjada (BKA) Holgerom Münchom na nowinarskej konferency předstajił. Dohromady 85 837 njeskutkow z politiskim motiwom je BKA loni registrował. To je negatiwny rekord wot zawjedźenja statistki w lěće 2001. Porno 2024 je ličba wo dwaj procentaj stupała. Tež pady namocy z politiskim motiwom su přiběrali, a to wo něhdźe 1,2 procentaj na 4 156 deliktow. Alexander Dobrindt znazorni, zo stupaja ličby padow na prawym kaž tež na lěwym boku ekstremistiskeje sceny. Ličba lěwicarskich deliktow bě loni porno předlětu wo 35 procentow wyša. Tola z wotstawkom najwjace deliktow – nimale połojcu­ wšitkich registrowanych – skućeja přiwisnicy praweje a prawicarskeje sceny. Prezident BKA Holger Münch skedźbni na to, zo socialne medije polarizaciju w towaršnosći přisporjeja, dokelž šěrja hidu, šćuwanje a propagandu. Zdobom pospěša proces radikalizowanja.