EU chce požadarjow wo azyl spěšnišo zaso wotpokazować

Brüssel (dpa/SN). Wot wopołnocy płaća w Europskej uniji nowe, chětro razne regule za azyl. Wone maja tomu dopomhać, zo stawaja so procesy kołowokoło azyla spěšniše a zo móža kraje ludźi konsekwentnišo dom pósłać. Wo reformje běchu so lěta dołho wadźili. Nowe regule maja tež tomu zadźěwać, zo ći, kiž škit pytaja, po krajach EU dale ćahaja – tak, zo přińdu na přikład z Grjekskeje abo Italskeje do Němskeje. Tuta tak mjenowana sekundarna migracija bě w minjenych lětach stajnje zaso přičina zwady mjez krajemi, kotrež su z čłonom EU.

Nowe regule předpisuja nimo toho, zo dyrbja so wo proces přizwolenja azyla kraje starać, w kotrychž su ludźi prěni raz registrowali. Tole běštej sej wosebje Němska a Francoska doraznje žadałoj. Kraje na mjezach EU pak tole jako přidatne poćeženje začuwaja.