Wojerecy (AK/SN). Pod hesłom „Mój čas je w twojimaj rukomaj“ swjećachu wobdźělnicy minjeny kónc tydźenja we Wojerecach 80. Serbski ewangelski cyrkwinski dźeń. „Njejsmy jenož digitalnje zwjazani. Woprawdźita zwjazanosć je wot čłowjeka k čłowjekej žiwa“, podšmórny sobotu fararka Jadwiga Malinkowa ze Slepoho na zahajenskim nyšporje dnja. Cyrkwinski dźeń je Serbow a přećelow z cyłeje Łužicy kaž tež z Drježdźan abo Lipska zjednoćił. We wodźenjach po měs­će zeznachu woni serbske Wojerecy. Sigrun Nasdala a Werner Sroka wobdźělnikam zajimawosće města spřistupništaj.