Wčerawši WM-dźeń so z hrě Irak – Norwegska zahaješe. Norwegskej so dźakowano top-nadběhowarjej Erlingej Haalandej zahe poradźi nawjedowanske wrota třělić. Po mjezystawje 1:1 pak Skandinawičenjo tak prawje „wotwjertnychu“ a docpěchu hišće troje wrota. Na kóncu doby Norwegska jasnje 4:1. Tutej hrě přizamkny so wustup koparskeje legendy Lionela Messija. W 17., 60. a 76. min. bul do wrotow třěli. Z tym aktualny zakitowar titula swětoweho mištra, Argentinska, wuspěšnje do turněra startowaše. Hru našeho susodneho kraja Awstriskeje přećiwo Jordaniskej móžachu zajimowani wčera rano w šesćich sćěhować. Runja dalšim partijam dnja bě tež wona na wrota bohata a skónči 3:1 za Awstrisku. Faworit z třomi dypkami do turněra startowaše. Lionela Messija slě­dowaše Ronaldo – a z tym bě koparska srjeda perfektna. Tola tak wuspěšnje kaž Argentinjan njeje Portugalčan do turněra startował. Jeho zaměr wšak je, w swojej glorioznej karjerje jedne koparske swětowe mišterstwo dobyć. Tola po tutej prěnjej hrě je wot toho hišće chětro zdaleny.