Ewangelscy Serbja na cyrkwinskim a na domizniskim dnju we Wojerecach so zešli

Hrónčko „Mój čas steji w twojej ruce“ bě wodźacy motiw 80. serbskeho ewangelskeho cyrkwinskeho dnja, kiž wotmě so minjeny kónc tydźenja we Wojerecach. „Njejsmy jenož digitalnje zwjazani. Woprawdźita zwjazanosć je žiwa wot čłowjeka k čłowjekej“, fararka Jadwiga Malinkowa ze Slepoho sobotu na spočatku nutrnosće podšmórny. W swojim prědowanju so bliše ze sabatom zaběraše. Korjeń sabata je w 1. knize Mójzasa wopisany. Bóh je swět w šěsć dnjach stworił, sedmy dźeń je wotpočował, je jón žohnował a jón swjećił (Genezis 2,1 – 3). „Naše žiwjenje je wjac hač jenož terminy. Je čas swjećić. Je čas Boha chwalić. Je čas za zhromadnosć“, fararka wuzběhny. „Tutón čas zhromadnosće chcemy hajić.“ Cyrkwinski dźeń zjednoća Serbow a přećelow Serbow ze wšeje Łužicy kaž tež z Drježdźan a Lipska. Pod hesłom „serbske Wojerecy“ přewjedźechu wodźenja po měsće w serbskej a němskej rěči. Sigrun Nazdalina z Němcow a Werner Sroka z Kinajchta je nawjedowaštaj.