Při młynje w Čornym Chołmcu hotuja so na premjeru

Čorny Chołmc (KD/SN). Lěćo w Čornym Chołmcu bjez dźiwadłoweho wjerška wo Krabaće? To je za wjele ludźi po wšej Łužicy mjeztym njepředstajomne. Tohodla zaso profesionelni dźiwadźelnicy – štyrjo mužojo a štyri žony – kaž tež 64 dalšich hrajerjow w starobje wot wosom do 80 lět z Čorneho Chołmca w Krabatowym młynje třeći dźěl cyklusa z titulom „W kurjawje samoty“ nazwučuje. Předstajenja wotměja so wot 27. junija do 19. julija přeco wječor we wosmich. Lětsa budźetej dwě předstajeni wjac hač loni. Kóždu inscenaciju móže sej 1005 hosći wobhladać, telko kaž hišće nihdy do toho, jednaćel kulturneho centruma Krabatowy młyn Čorny Chołmc Anton Fuchs wčera na rozmołwje z nowinarjemi wuzběhny. Mało jednotliwych kartkow je hišće na předań.