Festiwal dudakow najebać wjedrowe kapriole wuspěšny

Slepo (HA/SN/bn). Ze swjedźenskim ćahom po wsy je so wčera jubilejny 10. mjezynarodny festiwal dudakow w Slepom zakónčił. Nic naposledk mócnych zliwkow pjatk a sobotu dla wopokaza so njedźelna parada z dohromady 25 wobrazami, wotbłyšćowacych předewšěm stawizny a wšědny dźeń w Slepom, kaž tež z wjetšinu cyłkownje něhdźe 200 sobuskutkowacych hudźbnikow jako publikum najbóle přićahowacy magnet. Njehladajo na horcotu, zliwki a wichor zličichu po informacijach župy „Jan Lorenc-Zalěski“, pod kotrejež nawodom bu festiwal zhromadnje z tójšto regionalnymi partnerami zwoprawdźeny, cyły kónc tydźenja wjace hač 2 000 wopytowarjow. Byrnjež zajim na předchadźacymaj zarjadowanjomaj trochu wjetši był, je prěni facit organizatorow dosć pozitiwny. „Wjedro njemóžemy wobwliwować. Sobotu smy samo wo tym rozmyslowali, program dospołnje wotprajić, štož naposledk bohudźak trjeba njebě. Njedźelu mějachmy porno tomu wulku horcotu z nimale 40 stopnjemi celsiusa.