W Chrósćicach je so wčera a zawčerawšim wuspěšnje sakske mišterstwo w konjacym sporće z jedno- a dwupřežnymi zapřahami zakónčiło. Bě to mjeztym 7. turněr při Fulkec hórce, kotryž je konjace sportowe towarstwo „Při Klóšterskej wodźe“ Pančicy-Kukow přewjedło. Krajny mištr we wurisanju wulkich jednopřežnych zapřahow bu Klaus Seifert z Grumbacha blisko Wilsdruffa z 15lětnej kobłu Hot Black Girl. Chróšćanski lokalny matador Lukas Wenderoth wubědźi sej w pruwowanju z poměrnje sylnej konkurencu ze 14lětnym walachom Elbfürstom titul sakskeho wicemištra. Wenderoth je we wjacorych pruwowanjach startował, mjez druhim z pjećlětnej kobłu Lunu, kotruž bě Chróšćan Florian Zahrodnik plahował. Pohonč Lukas Wenderoth a sportowy kóń Luna wobsadźištaj jako duwo mjez druhim prěnje městno w přezpólnym jězdźenju klasy A. Wubědźowanje dwupřežnych zapřahow doby Anna-Sophia Zahn z ponyjomaj Godleaf a Ginger. Wobdźěliło bě so 40 zapřahow z wjacorych zwjazkowych krajow, mjez druhim ze Sakskeje, Braniborskeje a Durinskeje.