Z Erlingom Haalandom a Marcusom Pedersenom je so narodne mustwo Norwegskeje po wčerawšej skupinskej hrě přećiwo Senegalej za k.-o.-koło kwalifikowało. Haaland trjechi dwójce a móžeše kaž hižo husto z jara dobrym wukonom dobyću 3:2 přinošować. Potajkim póńdźe za Norwegčanow w poslednjej skupinskej hrě přećiwo Francozam při­chodny tydźeń wo skupinske dobyće. Za Senegal a Irak, tamnej teamaj skupiny I, budźe jara wusko, hdyž póńdźe wo dalepřińdźenje najlěpšich třećich jednotliwych skupin. Tež w skupinje J mamy prěnje rozsudy. Tam dyrbi so Jordanska po poražce 1:2 přećiwo Algeriskej wot turněra rozžohnować. Jordančenjo su hru nimale 70 mjeńšin 1:0 nawjedowali, tola wokoło 20 mjeńšin do kónca dachu so wot lěpšich Algeričanow přewinyć. Po wčerawšej hrě přećiwo Uzbekistanej za Portugalsku poněčim lěpje wupada. Po tym zo bě mustwo wokoło Cristiana Ronalda z 1:1 přećiwo DR Kongo do turněra startowało, poradźi so jemu přećiwo Uzbekistanej­ wčera prěnje dobyće. Uzbekojo njeběchu přećiwnicy na samsnej runinje,­ a Portugalska jědnatka sej z 5:0 tři dypki a sebjewědomje zdoby.