Zahe rano skónči so wčera druhi hrajny dźeń lětušeho swětoweho koparskeho mišterstwa. Panama – Chorwatska a Kolumbiska – DR Kongo, to běštej poslednjej partiji druheho hrajneho dnja. Chorwatska je ze swojim kapitanom Luku Modrićom snadnje přećiwo Panamje dobyła. Łaćonskoameričenjo bychu sej poprawom znajmjeńša njerozsudny wuslědk zasłužili. Přećiwo chorwatskemu wrotarjej Dominikej Livakovićej njemějachu pak žanu šansu. Skónčnje wostanje mjez Chorwatskej, Jendźelskej a Ghanu nastupajo dalepřińdźenje w skupinje L wusko. Panama po tutej poražce hižo pódla njeje. W skupinje K pak je so Kolumbiska po dobyću 1:0 přećiwo DR Kongo za k.-o.-fazu kwalifikowała. Kolumbiska bě 90 mjeńšin lěpše mustwo, ale nic, štož eficiencu nastupa. Zwrěšćichu z mnohimi pospytami na keeperu DR Konga, Lionelu Mpasiju. Hakle w 76. min. buchu Kolumbičenjo mytowani, a to zasłužbnje. Wčera wječor widźachmy potom prěnje partije třećeho hrajneho dnja. W paralelnych hrach dźěše w skupinje B wo kónčne zaměstnjenje w skupinskej tabulce.