To ničo njebě. Němska je swoju poslednju skupinsku hru přećiwo Ekwadorej 1:2 přěhrała. Němska wubranka drje hižo w druhej mjeńšinje přez Sanéja nawjedowaše, tola wjace potom hižo njepřińdźe. Ekwador měješe sylnišu wolu dobyć hač jědnatka DFB, a na kóncu su sej Južnoameričenjo dobyće tež zasłužili. Runočasnje doby mustwo Słonowinoweho pobrjoha 2:0 přećiwo wubrance z Curaçao a je z tym jako skupinski druhi dale. Tež Ekwadorčenjo so wjesela, zo wostanu dale w turněrje, wšako maja na třećim městnje tabulki štyri dypki, štož dosaha. Wčera zahe rano hraještej skupinje C a A poslednje hry hrajneho dnja.
W skupinje C docpě Brazilska z dobyćom 3:0 přećiwo Šotiskej skupinske nawjedowanje. Na druhim městnje steji Marokko, kiž po dobyću 4:2 přećiwo Haitijej dale přińdźe.
W skupinje A sta so w nocy wulka překwapjenka. Južna Afrika, kotraž njebě wosebje derje do turněra startowała, je njewočakowano přećiwo Južnej Koreji 1:0 dobyła. Z tym njebě nichtó ličił. Tola tute dobyće ma někotre wuskutki. Južna Afrika je jako druhi tabulki dale. Mexiko móžeše Čěsku z 3:0 porazyć, kotraž je z tym z turněra won.
