Wot 30. junija hač do 1. julija 1951 bě w Bórkowach w Błótach Serbski kulturny swjedźeń. Po tym wuzběhowachu nowiny, zo jednaše so wo najwjetše narodne zarjadowanje w Delnjej Łužicy po Druhej swětowej wójnje, na kotrymž so něhdźe 30 000 ludźi wobdźěli. Na manifestaciji 1. pražnika na Bórkowskim sportnišću bě jako čestny hósć ministerski prezident młodeje NDR Otto Grotewohl přitomny. Nimo narěčow a spěwow bě masowa scena serbskeje młodźiny wosebity wjeršk: Něhdźe 400 porow předstaji ratarske dźěła wot nalěća hač do nazymy kaž tež serbske nałožki w běhu lěta. Choreografiju bě Sonja Šajbic, dźowka něhdyšeho wjelelětneho starosty Serbskeho Sokoła Jakuba Šajby-Dobrošćanskeho zestajała. Dokelž běch sam rejowar, podam někotre nadrobnosće: Do Błótow běchmy so z wosebitym ćahom z Budyšina hač do Choćebuza dóstali a wottam na wuskokolijowej železnicy (z „Gustu“, bohužel 1972 wottorhanej) błótowsku a najwjetšu wjes NDR docpěli. Spěwajo pochodowachmy hač k małemu přistawej, hdźež nas delnjoserbscy prócowarjo wokoło Karla Jordana wutrobnje witachu.