Njeswačidło (SN/bn). Pod hesłom „Dialogi na hrodźe“ wuhotowachu wčera Gerold Gnausch (klarineta, saksofon), Matthias Hübner (cello) a Paul Bernewitz (křidło) lětsa druhi Njeswačanski koncert na hrodźe. Na kopatej połnej žurli – nawal bě zarjadowace Kulturne a domizniske towarstwo Njeswačidło tak překwapił, zo ani stólcy ani spřihotowane programowe leporela njedosahachu – zahrachu so wotměnjejo solistisce, w dueće a jako trijo wubrane kompozicije mjez druhim Georga Friedricha Händela, Johanna Sebastiana Bacha a Françoisa Couperina. Kontrast k mištram baroka wutworichu z dohromady dźesać twórbami Jana Cyža. Sylny aplaws publikuma bě instrumentalistam mytowanje wuběrneho wirtuozneho wukona a dopokaz, zo njezamóže nowa serbska hudźba žurle jenož pjelnić, ale tež zahorjeć.