Berlin/Podstupim (SN/MiP). Sudniske jednanja w zwisku z prašenjom, hač gmejna abo wjes w gmejnje serbskemu sydlenskemu rumej přisłuša abo nic, je wyše zarjadniske sudnistwo Berlin-Braniborska minjeny štwórtk w šěsć padach zakónčiło. Wone wobrući wusudy prěnjeje instancy – zarjadniskeho sudnistwa w Choćebuzu – za gmejny Kopańce/Sprjewja (Neuhausen/Spree), Dolina Nyse a Małkse (Neiße-Malxetal), Derbno pola Gubina (Schenkendöbern), Gójacki jazor (Schwielochsee), Markojska Góla (Märkische Heide) a Feliksowy jazor (Felixsee). Choćebuscy sudnicy běchu zapodaćam tutych gmejnow, zo nochcedźa scyła abo zdźěla serbskemu sydlenskemu rumej přisłušeć, přihłosowali. Po jich měnjenju njebě dosahacych dokładow za wobstajne hajenje serbskeje kultury a rěče w tutych gmejnach resp. gmejnskich dźělach, kajkež dyrbjeli po § 3 braniborskeho Zakonja za prawa Serbow (SWG) předležeć. Wyše zarjadniske sudnistwo je na próstwu braniborskeho knježerstwa a rady za serbske naležnosće powołanje (Berufung) přećiwo wusudej zarjadniskeho sudnistwa pruwowało a dowoliło.