Po tym zo je sobotu w nocy Jendźelska 6:4 přećiwo Francoskej w hrě wo třeće městno dobyła, sćěhowaše njedźelu, tež hač do nocy wulka kónčna hra. Španiska a Argentinska, zbytnej mustwje, wužadaštej so w New Yorku.

Španičenjo startowachu do hry hnydom z wjacorymi šansami. Lamine Yamal wuhra sej hižo w 5. min. móžnosć na wrota, tola wrotar Argentinskeje Martínez­ wotfalšowany bul zawěsći. Hač do 40. min. dominowaše Španiska z bulom, tola nichtó so na woběmaj bokomaj strašnje wrotam njepřibliži. Počasu pak koparjo Španiskeje dale a časćišo puć k wrotam namakachu.

W prěnich mjeńšinach druheho połčasa hrajachu Argentinjenjo na zwučene wašnje. Jich mnohe foule přetorhnychu stajnje zaso hru, tola Španiska přewza zaso­ kontrolu. Hač do 90. min. to tež tak wosta. „La Furia Roja“ třěleše husto na wrota, tola pospyty njeběchu wuspěšne. W 90. + 3 widźeše Enzo Fernández z Argentinskeje žołto-čerwjenu kartu. Nětko hraješe wubranka Argentinskeje z jednym mužom mjenje.