Smochčanski hudźbny swjedźeń lětsa jako nawrót ke korjenjam

Smochćicy (SN/bn). „Hižo 25 lět dołho, 21 z nich zhromadnje ze Serbskim ludowym ansamblom, wuhotujemy Hudź-bny swjedźeń Smochćicy. Bě tuž na času, zo sej naše korjenje spřitomnimy a so po tym, zo smy tu hudźbu ze wšěch kónčinow swěta zasłyšeli, do Łužicy nawróćimy.“ Z tutymi słowami powita nawodnica kubłanišća swj. Bena Sybille Richards předwčerawšim něhdźe 500 wopytowarjow na dworje bywšeho Smochčanskeho ryćerskeho kubła zahajiwši hłowny program lětušeho swjedźenja pod hesłom „Serbskej nocy“. Intendant SLA Tomas Kreibich-Nawka wuzběhny, zo je swoja institucija „mjeztym 75 lět dołho z krutym a formowacym wobstatkom serbskeho kulturneho žiwjenja“ a připowědźi „150 lět serbskich hudźbnych stawiznow přesahowacy program z tójšto znatymi, někotrymi­ njeznatymi a nowymi zynkami“. Hladajo na poprawom prěnje planowane předstajenje, kotrež bu minjeny pjatk špatneho wjedra dla wotprajeny, přeprošeše wón zajimcow na nachwatanskej terminaj 19. a 20. oktobra na žurli SLA w Budyšinje.