Budyšin (SN/bn). Pod hesłom „Love not hate“ (lubosć město hidy) wotmě so wčera dalše, wot moderatorow žortnje jako mjeztym 1 847. wudaće deklarowane zarjadowanje rjadu Happy monday Bautzen – Wjesoła póndźela Budyšin před Němsko-Serbskim ludowym dźiwadłom. Na něhdźe na połojcu wobmjezowanym naměsće, kotremuž w sprjewinym měsće dźiwadłowe naměsto rěkaja, so z wopytowarjemi jenož tak mjerwješe, jako młoda band Planlos hudźbny dźěl programa zahaji. Ze swojej měšeńcu dixielanda, bossa novy a austropopa njepostara so jenož wo pohib w publikumje, ale zdobom wo poradźenu uwertiru za wustup skupiny Banda Comunale. Mjezynarodny Drježdźanski kolektiw zahori hosći ze soul, ska a funk kaž tež rytmy Balkana, Južneje Ameriki a Indiskeje kombinowacymi zynkami. Wjacore spěwy přednjese zhromadnje z dorostowymi muzikantami z Budyšina a wokoliny. We wobłuku dwudnjowskeje dźěłarnički běchu je zhromadnje nastudowali. Jako překwapjenka přidruži so jim na kóncu koncerta znata Budyska šansoneta Jela J.