W Ralbicach přihotuja znowa powołanske wiki

Ralbicy (SN/StŠ). Za dwě njedźeli, 8. oktobra, wotměja so w Ralbicach, w tamnišej sportowej hali, znowa powołanske wiki. To je mjeztym třeći raz, zo so firmy z wokoliny šulerjam, ale tež wšitkim dalšim zajimcam předstaja. „Mamy dotal wokoło 50 přizjewjenjow. To je něhdźe samsne mnóstwo kaž smy je na dotalnych wikach hižo měli. Nowostka lětsa skerje budźe, zo zarjadujemy wjace přednoškow a dźěłarničkow. To zwisuje z tym, zo chcemy našim šulerjam a zajimcam prosće wjace praktiskeje wědy sposrědkować“, powěda wučer Serbskeje wyšeje šule Ralbicy Mathias Kliemank. Zhromadnje z wučerku Francisku Wróblowej ma organizaciju wikow na starosći. „Je poprawom wšitko tak daloko spřihotowane. Wosebje rjenje je, zo poprawom z ničim samaj njestejimoj. Wšojedne hač kolegojo, šulerjo, starši, gmejna, firmy – naju woprawdźe wšitcy podpěruja. A to je přewšo spomóžne zhromadne dźěło. Wosebje nastupajo wabjenje, potajkim připrawjenje a rozdźělenje našich plakatow, je nam jara wjele ludźi pomhało. To je chwalby hódne a přemóžace.“