Dźiwadła regiona zhladuja skeptisce na swój financielny přichod

Budyšin/Zhorjelc (SN/MG). Hdyž statej pjenjezy pobrachuja, potom wón často najprjedy na tak mjenowanych „mjechkich“ faktorach lutuje. Jedyn z nich je kultura. Najaktualniši přikład za to je Zhorjelski wokrjes. Tamniši wokrjesny sejmik je so na wurjadnym posedźenju wutoru intensiwnje najwjetšej kulturnej instituciji wěnował, na kotrejž ma wo­krjes wulke podźěle: Gerharta Hauptmannowe dźiwadło w Zhorjelcu a Žitawje. Radźićelki a radźićeljo su so na to dojednali, zo wokrjes swoju pjenježnu podpěru za dom wot lěta 2029 na 4,5 milionow eurow wobmjezuje. Wot lěta 2030 ma suma spěchowanja potom lětnje wo tři procenty stupać. Z tym radźićelki a radźićeljo jednomu z dohromady třoch namjetow zarjadnistwa wokrjesa sćěhuja.