Marija-Tereza Krawžic je wot lětušeho awgusta młodźinska referentka w zarjedźe Domowiny. Wotrostła bě wona w Chrósćicach a je so po maturje na Serbskim gymnaziju w Budyšinje do Berlina podała, zo by tam socialne dźěło studowała. Dostudowawši swój bachelor dźěše do Lipska, hdźež přizamkny masterski studij w samsnym předmjeće. Po zakónčenju studija něšto lět w Lipsku w pěstowarni dźěłała.

„Lětsa pak sym pytnyła, zo je čas, zo so do Łužicy nawróću“, Marija-Tereza Krawžic w swojim běrowje w Serbskim domje powěda. Swoje nadawki wona hižo trochu znaje, wšako bě bywšu młodźinsku referentku Virginiju Hanuzowu před něšto časom hižo někotre měsacy zastupowała. Nětko pak chce so młodźinska referentka najprjedy z aktualnymi potrjebami młodostnych w serbskej Łužicy rozestajeć. Zhromadnje ze serbskim młodźinskim towarstwom Pawk prosy wona tuž předsydow młodźinskich klubow a towarstwow sobotu, 14. nowembra, na tak mjenowanu „Klub-šef-etažu“ do Radworskeho Słodeńka. Z młodostnymi chce so Krawžic wo tym dorozumić, kotre projekty abo kajku podpěru sej woni přeja.