Adis Abeba (dpa/SN). Prezident USA Barack Obama je dźensa Etiopisku wopytał. Je to jeho prěnja jězba do wuchodoafriskeho kraja. W běhu dnja wočakowaštej jeho ministerski prezident Hailemariam Desalegn a prezident Mulatu Teshome k politiskim rozmołwam. Obama bě wčera w Keniji, w ródnym kraju swojeho nana. Jutře chce we hłownym sydle Afriskeje unije narěč dźeržeć. Při tym wo­čakuja, zo prezident USA bój přećiwo somaliskej milicy Al-Shabaab tematizuje. Hakle wčera běchu ekstremisća w stolicy Mogadishu před hotelom bombu rozbuchnyli a 15 ludźi do smjerće storhnyli. Hižo na wopyće w Keniji bě Obama namołwjał, konsekwentnje přećiwo islamistiskim milicam postupować.

Stuttgart (dpa/SN). Ze sydomdypkowym programom chcetej Badensko-Württembergska a Bayerska přichodnje zhromadnje přećiwo paducham postupować, kotřiž so do bydlenjow zadobywaja. „Juh Němskeje ma so paducham z přewšo strašnej kónčinu stać“, rjekny nutřkowny minister Badensko-Württembergskeje Reinhold Gall (SPD) minjeny pjatk při podpisanju kooperaciskeho zrěčenja wobeju krajow w Stuttgarće. Bayerski nutřkowny minister Joachim Hermann (CSU) rěčeše wo „boju přećiwo profesionelnym cwólbam z wuchodneje Europy“.

W juhoněmskich zwjazkowych krajach je ličba padustwow w bydlenjach minjene lěta dramatisce rozrostła. Tola tež w druhich kónčinach Němskeje registruja dźeń a wjace tajkich padow, wjace hač 152 000 w minjenym lěće.

Program předwidźi mjez druhim wšědnu wuměnu datow wo podhladnych wosobach abo awtach. Tež wuhódnoćenje slědow paduchow ma so polěpšić. Při zhromadnych kontrolach na awtodróhach chcedźa skućićelow dosahnyć.

Drježdźany (dpa/SN). Prěnje poł lěta su lětsa w Sakskej mjenje wopačnych pjenjez namakali hač w samsnym času 2014. Byrnjež ličba wopačnych papjerjanych pjenjez přiběrała, je mnóstwo falšowanych twjerdych pjenjez woteběrało, zdźěli dźensa krajny kriminalny zarjad. Cyłkowna škoda wučinja mjeztym 80 500 eurow, jeničce pola bankowkow dobre 74 000 eurow. Najwjetši dźěl falšowanych bankowkow běchu 50eurowki, slěduja 20- a stoeurowki. Pola twjerdych pjenjez su dwucentowe najwoblubowaniše fal­šowanja. Najwjace wopačnych pjenjez namakachu w Lipsku, najmjenje w Drježdźanach. Při tym napadny zamołwitym přiběraca profesionalnosć falšowarjow. Wopačne pjenjezy zwjetša hakle napadnu, hdyž je wobchodnicy k bance donjesu. Mnozy njejsu sej toho wědomi, zo z wopačnymi pjenjezami płaća. Falšowarjow lepić je tohorunja wobćežne, dokelž maja dźěłarnje zwjetša we wukraju. Srjedź julija běchu 66lětneho Žitawčana zasudźili, kiž bě 2 000 stodolarskich ban­kowkow­ zhotowił.

Mała zwada wo blešku piwa je so na Mnichowskim­ hłownym dwórnišću k ma­sowej bijeńcy wuwiła. Něhdźe dźesać ludźi spyta spočatnje w diskusiji mjez předawarku a kupcom posrědkować, kaž zwjazkowa policija zdźěli. Dalše wosoby a stražnik so do zwady měšachu, na čož situacija eskalěrowaše. Skónčnje stražnik 36lětneho powali, na čož dyrbjachu jeho do chorownje dowjezć. Přećiwo stražnikej a pjeć dalšim wosobam přepytuja nětko ranjenja ćěła dla.

Dokelž njeje paduch pokradnjeny trezor wočinić móhł, je wjacorych rjemjeslnikow wo pomoc prosył. Prašeše so jich, hač njemóhli trezor namócnje wotewrěć, dokelž je pječa kombinaciju ličbow zabył. Firma w Ulmje wšak policiju zawoła, a ta zwěsći, zo bu mały trezor z bydlenskeho domu pokradnjeny.