Straßbourg (dpa/SN). Parlament EU chcyše dźensa wo swojim stejišću k nowemu rjadowanju EU jězbneje dowolnosće rozsudźić. Dźěše wo to, hač bychu zawjazowace strowotniske přepytowanja staršich šoferow witali abo nic. Při přepytowanjach ma so pruwować, hač su šoferojo strowotnisce hišće kmani, so za wodźidło sydnyć. Němcy wobhladuja přepytowanja kritisce. Čłonske kraje EU tajke rjadowanje wotpokazuja. Komisija EU chcyła nadróžny wobchad wěsćiši činić a ličbu smjertnych woporow znižić. Při tym bě debata wo tym wudyriła, hač su starši šoferojo na dróhach skerje riziko.

Berlin (dpa/SN). W Čerwjenym morju za škit wikowanskich łódźow zasadźena němska fregata „Hessen“ je prěni nadpad w Jemenje skutkowaceje milicy ­Huthi wotwobarała. Na wojerskej misiji EU „Aspides“ wobdźělena wójnska łódź je po informacijach powěsćernje dpa njepřećelskej objektaj w powětře wottřěliła. Bě to prěnje wojerske zasadźenje minjenu pjatk zahajeneje misije, kiž drje je dotal najstrašniši nadawk w stawiznach mariny zwjazkoweje wobory.

Z Iranom zwjazana milica Huthi stajnje zaso wikowanske łódźe z trutami a raketami nadběhuje, zo by sej kónc ­israelskich nadpadow w Gazaskim pasmje wunuzowała. Israelske zasadźenje je reakcija na terorowy nadpad islamistiskeje Hamas na Israel 7. oktobra 2023.

Zwjazkowy sejm bě minjeny pjatk wobdźělenju němskeje mariny na misiji EU „Aspides“ přihłosował. Po słowach zakitowanskeho ministra Borisa Pistoriusa (SPD) ma łódź k stabilizowanju regiona přinošować. Nadpady Huthi w tute kónčinje běchu minjeny čas raznje přiběrali.

Zo z komunikaciju wo změnje strukturow tež w Serbach klaca, su wosebje tež w Slepjanskich kónčinach nazhonili – tomu móžeše prěnja „serbska debata“ tróšku wotpomhać. Zajim ludźi z Delnjeje Łužicy pokaza, zo njeje Serbstwo w Slepom jenož móst do słowjanskeho wukraja, ale tež mjez Hornjej a Delnjej Łužicy. Budźemy tohodla wuslědki tuteje debaty přichodny tydźeń wobšěrnje dokumentować. Wječor je tež wobkrućił, zo móže serbšćina dominantna rěč być, bjeztoho zo by něchtó wuzamknjeny był (dźak słuša tu našej kolegowce Milence Rječcynej za simultane tołmačenje). Tež Krajna centrala za politiske kubłanje je swój cil docpěła, kontrowersnu diskusiju zmóžnić. Tohodla słuša tohorunja tutym partneram z Drježdźan hižo po prěnim ze štyrjoch terminow dźak. Tu su prěnjotnje Serbja mjez sobu diskutowali – na swoje wašnje wo swojich temach. Takrjec komunikatiwne samopostajowanje ludu, kiž je wjac hač jenož pisany připlack wjetšinje. Marcel Brauman

Hamburg (dpa/SN). Předewzaća w Němskej dyrbja so 2024 po posudku zawěsćernje kreditow Allianz Trade po wšěm swěće třeće lěto za sobu na přiběracu ličbu insolwencow nastajić. „Tute wuwiće potrjechi – byrnjež zapozdźene w přirunanju z druhimi europskimi krajemi – tež Němsku“, wěsća hospodarscy fachowcy w Hamburgu zasydleneje wotnožki zawěsćernje Allianz. „Trajaca słabosć hospodarstwa, strukturne wužadanja a špatniše wuměnjenja financowanja powjedu hišće wjace předewzaćow Němskeje do pjenježnych wuskosćow“, w rozprawje hospodarskich fachowcow rěka.

Ličba insolwencow němskich přede­wzaćow 2024 wo něhdźe 13 procentow přirunujo z lońšim lětom přiběra. Wuwiće je so hižo druhe połlěto 2023 zahajiło, zawěsćernja zdźěla. To bě ličba plajtow wo 25 procentow rozrostła, „čemuž su hosćency, wikowanje a twarska branša přinošowali“. Wotpowědujo tutomu wuwiću wočakuja fachowcy lětsa něhdźe 20 260 insolwencow. Hakle 2025 liča na zakładźe lěpšeho hospodarskeho wuwića zaso ze stabilnišim niwowom insolwencow pod 20 000 padami.