Kretschmer Sputnik V skazał
Moskwa (dpa/SN). Sakski ministerski prezident Michael Kretschmer (CDU) je na swojim wopyće w Ruskej z tamnišim prezidentom Wladimirom Putinom telefonował. W rozmołwje rěčeštaj wobaj mjez druhim tež wo boju přećiwo koronapandemiji. Putin potwjerdźi zwólniwosć ruskeje strony, z němskimi partnerami při dodawanju šćěpiwa a jeho zhotowjenju hromadźe dźěłać, kaž rěčnik Krjemla wčera zdźěli. Ale tež konflikt na Ukrainje a połoženje w chłostanskim lěhwje zajateho opozicionalneho Alekseja Nawalneho staj Putin a Kretschmer wobrěčałoj. Wobaj dypkaj němsko-ruske poćahi tuchwilu chětro poćežujetej.
Po rozmołwje z ministrom za strowotnistwo Michailom Muraškom Michael Kretschmer připowědźi, zo chcyła Němska 30 milionow dozow ruskeho šćěpiwa Sputnik V kupić. Wuměnjenje je dowolnosć Europskeho zarjada za dohladowanje lěkow, kotruž wočakuja w meji. Kretschmer z toho wuchadźa, zo Saksojo ruske šćěpiwo přećiwo koronawirusej wulce witaja.
Plany biskopstwa za nowy ordinariat předstajene
Drježdźany (SN/JaW). Swoje plany wo móžnym nowotwarje ordinariata je Drježdźansko-Mišnjanske biskopstwo na zjawnym internetnym słyšenju předwčerawšim, srjedu, předstajiło. K zazběhej třihodźinskeho zarjadowanja rjekny generalny wikar biskopstwa Andreas Kutschke, zo zaměr mjez druhim je „zjawnosć informować, wo čim smy rozmyslowali, što je planowane a předwidźane“.
Biskopstwo ma w sakskej stolicy dwě imobiliji – jednu na Hasy Käthy Kollwitz a jednu na Schwerinskej dróze –, kotrejž stej dodźeržanej. Nimo toho maja we woběmaj njesměrne kóšty za reparatury nałožić, lětnje maja za nje 75 000 eurow zaplanowane.
To a tamne (23.04.21)
Dźesać paletow čriji spakosćili su paduši na parkowanišću při awtodróze A 13 njedaloko Drježdźan z připowěšaka Lkw-ja. 46lětny šofer bě swoje nakładne awto na parkowanišću Finkenberg w Mišnjanskim wokrjesu wotstajił a so spać lehnył. Narano pak wón zwěsći, zo su njeznaći planu awta rozrězali a palety črijow w cyłkownej hódnoće 20 000 eurow pokradnyli.
Hižo zaso su wopicy ze zwěrjenca w badensko-württembergskim Löffingenje twochnyli. Sobudźěłaćerjo móžachu tři ze štyrjoch wopicow na bliskej zwjazkowej dróze popadnyć. Prawdźepodobnje běchu zwěrjata wokoło twarnišća w zwěrjencu móžnosć namakali so zminyć. Hakle před tydźenjomaj bě wjace hač 20 berberskich wopicow z mjenowaneho coowa ćeknyło. Wone su spłóšiwe a bojazliwe. Móža pak agresiwnje reagować, čuja-li so wohrožene.
Serbja njejsu „drěmacy pokład“
Drježdźany (SN/bn). „Młody a serbski – perspektiwy přichoda za Serbow“ bě hesło zakónčaceho digitalneho zarjadowanja rjadu „Serbja we Łužicy – Drěmacy pokład w Sakskej“ Politiskeho kubłanskeho foruma Konrada Adenaueroweje załožby. Po naprašowanju hosćićelow-moderatorow Johanny Hohaus a Benedikta Bierbauma běchu dwě třećinje dohromady něhdźe 70 přihladowarjow Serbja.
Předsyda Domowiny Dawid Statnik rozłoži přitomnym stawizny, natwar, nadawki a wuhlady třěšneho zwjazka serbskich towarstwow, kotrehož předstaji jako „najwjetše a najsylniše zjednoćenstwo serbskeje ciwilneje towaršnosće a prawnisce připóznateho zastupjerja zajimow serbskeho ludu“. Hladajo na temu wječora wón wuzběhny, zo „je zwjeselace, kelko młodźinskich towarstwow je w minjenym času Domowinje přistupiło. Młodźina smě wšitko do prašenja stajić, smě wšitko znowa wunamakać, změnić, wotstronić – ale prošu serbsce!“
FDP připowědźa skóržbu
Zwjazkowy sejm nuzowe borzdźidło schwalił – Zwjazkowa rada dźensa
Berlin (dpa/SN). Po wčerawšim rozsudźe zwjazkoweho sejma wo cyłoněmskim nuzowym borzdźidle přećiwo třećej žołmje koronapandemije měješe dźensa Zwjazkowa rada jako zastupnistwo zwjazkowych krajow wo tym rozsudźić. Powšitkownje wočakowachu, zo gremij wčerawše wobzamknjenje schwali.
Němski zwjazkowy sejm bě wčera zakoń wo škiće před infekcijemi změnił. Tak je nětko móžno ludźom zakazać, w času wot 22 do 5 hodź. dom wopušćić, su-li ličby infekcijow wotpowědnje wulke. Cyłkownje 342 zapósłancow hłosowaše za noworjadowanje, 250 bě přećiwo tomu, 64 zapósłancow so hłosa wzda. Do toho běštej so frakciji unije a SPD za zakoń wuprajiłoj, AfD, FDP a Lěwica hłosowachu přećiwo tomu, Zeleni so hłosa wzdachu.
Gripa lětsa wupadnyła
Berlin (dpa/SN). Z runje 519 w laborje wobkrućenymi padami gripy drje so najsłabša gripowa sezona minjenych lětdźesatkow w Němskej nachila. Roberta Kochowy institut bě zwěsćił, zo njeběchu kriterije za žołmu gripy spjelnjene. To je nowosć w 1992 załoženej dźěłowej skupinje instituta, kotraž wuwiće gripy wobkedźbuje. Tež druhe kraje na sewjernej połkuli swěta njemějachu žanu gripu. W lětomaj 2017/2018 bě hišće 25 000 ludźi na gripu zemrěło.
Tysac demonstrantow zajatych
Moskwa (dpa/SN). Wjace hač tysac ludźi je ruska policija při demonstracijach přiwisnikow w chłostanskim lěhwje zajateho přećiwnika Krjemla Alekseja Nawalneho zajała. Aktiwisća za zachowanje čłowjeskich prawow registrowachu zajeće we wjace hač 80 městach kraja, mjez nimi 300 jeničce w Pětrohrodźe. Demonstranća sej žadachu, ćežko schorjeneho 44lětneho kritikarja prezidenta Putina pušćić a lěkarsce zastarać.
Wuradźuja wo změnje klimy
Sakska prezentuje so w Ruskej
Pětrohród/Kamjenica (dpa/SN). Na dźensa wječor zahajacym so Němskim tydźenju w ruskim Pětrohrodźe chce Sakska přichodne dny intensiwnje za Kulturnu stolicu 2025 w Kamjenicy wabić. Při tym dźe wo to, ideju w Ruskej předstajić, kontakty pěstować a wuměłcow na zhromadne dźěło přeprosyć, rjekny přechodny jednaćel towaršnosće Kulturna stolica Christoph Dittrich powěsćerni dpa. „Spušćamy so na to, zo móc kulturneje wuměny a dialoga w zmysle spomóžneho a humanistiskeho wusměrjenja skutkuje“, rjekny Dittrich hladajo na politiske połoženje w Ruskej.
Po informacijach statneje kenclije prezentuje so Sakska jako partnerski zwjazkowy kraj Němskeho tydźenja z něhdźe 30 zarjadowanjemi we wobłuku kultury, hospodarstwa a wědomosće. K tomu słušeja čitanja, dźěłarnički a koncerty. Tuchwilneje koronapandemije dla so tójšto zarjadowanjow internetnje wotměwa. Přiwšěm přebywa delegacija ze Sakskeje w měsće nad Njewu, ke kotrejž tež Dittrich słuša, kaž zdźělichu.
Čěska Ruskej ultimatum stajiła
Praha/Moskwa (dpa/SN). Diplomatiska zwada mjez Prahu a Moskwu so dale přiwótřa. Nowy wonkowny minister Čěskeje Jakub Kulhánek je Ruskej wčera wječor ultimatum stajił. Wón Krjeml namołwi, hač do dźensnišeho w 12 hodź. wšitkim wupokazanym 20 čěskim diplomatam nawrót do čěskeho wulkopósłanstwa w Moskwje zmóžnić. Hewak chcyła Praha ličbu w Praze akreditowanych ruskich diplomatow runje tak pomjeńšić. Praktisce by to rěkało, zo Čěska dalšich 20 Rusow wupokaza. Ruska je žadanje wotpokazała a sej „ton“ zakazała.
Čěska ruskej tajnej słužbje wumjetuje, zo je wina na rozbuchnjenju municiskeho składu we Vrběticach na wuchodźe Čěskeje lěta 2014. Při tym běštaj dwaj dźěłaćerjej žiwjenje přisadźiłoj. Rěčnik Krjemla rěčeše naposledk wo absurdnych a njedopokazanych wumjetowanjach. Wobaj krajej běštej minjeny kónc tydźenja sobudźěłaćerjow wulkopósłanstwow mjez sobu wupokazałoj – Praha wupokaza 18 Rusow, Moskwa 20 Čechow. Wobkedźbowarjo rěča wo najćešej krizy minjenych lětdźesatkow w poćahach mjez Čěskej a Ruskej.
Dźiwna kóncowka „ka“
Strach wjelčich nadpadow přiběra
Drježdźany (dpa/SN). Ze zahajenjom pasenskeje sezony rozprawjeja w Sakskej zaso wo přiběracej ličbje wjelčich nadpadow. Wosebje potrjechenej stej tuchwilu Kulowska a Kamjenska kónčina, zdźěli fachowy wotrjad „Wjelk“ krajneho wobswětoweho zarjada. Ratarjo a zwjazki plahowarjow skotu rěča hladajo na wuwiće wo „napjatym połoženju“.
Fachowy wotrjad wobsedźerjow skotu namołwja, škitne naprawy za swoje stadła přepruwować a wudospołnić. Stoprocentny škit před nadpadami wjelkow drje móžny njeje. Najskutkowniši pak je derje twarjeny elektriski płót.
Krajny zwjazk ratarjow rozprawja, zo su wjelki lětsa hižo 83 skoćatow na pastwach nadpadnyli. Woprawdźita ličba drje je dwójce tak wulka. Dźensa chcychu na internetnym zhromadnym zarjadowanju, mjez druhim z plahowarjemi wowcow, kozow a konjow, wo dalšim postupowanju wjelka dla wuradźować. Po słowach ratarskeho zwjazka dyrbjeli jasnje postajić, kelko wjelkow smě w Sakskej žiwych być. Tež wo pasmach bjez wjelkow měli rozmyslować, měni rěčnica zwjazka Diana Henke.
