Praha (dpa/SN). Čěski parlament je podlěšenje wukazanych wobmjezowanjow koronapandemije dla wotpokazał. Mjeńšinowe knježerstwo ministerskeho prezidenta Andreja Babiša njemóžeše so wčera wječor ze swojim žadanjom přesadźić, nuzowy staw hač do 16. měrca podlěšić. Alternatiwy z krótšimi časowymi dobami njenamakachu žanu wjetšinu. Wot oktobra płaćiwy nuzowy staw so tuž zajutřišim, njedźelu, skónči.
Prezidenća pjeć zarjadniskich regionow připowědźichu, zo chcyli ze swojeje strony „staw wohroženja“ wukazać. W emocionalnej debaće běchu zastupnicy knježerstwa před přežadanjom strowotniskeho systema warnowali. „Zańdźemy do stawiznow jako kraj, kiž wosrjedź wójny swoje wójsko cofnje“, warnowaše nutřkowny minister Jan Hamáček. Opozicija na to pokaza, zo su ludźo zadwělowani a knježerstwu hižo njedowěrjeja.
Waršawa (dpa/SN). Pólskemu knježerstwu su wuprajenja němskeho zwjazkoweho prezidenta Franka-Waltera Steinmeiera k nastawacemu płunowodej Nord Stream II přičina, debatu wo němskich reparacijach za w Pólskej načinjene škody za čas Druheje swětoweje wójny znowa nastorčić. „Jeli Němcy měnja, zo njebuchu wot němskeho stata za čas Druheje swětoweje wójny zawinowane škody zarunane, potom čaka w prěnim rjedźe tón kraj na zarunanje, kiž měješe w tutej wójnje najwjetše škody znjesć“, rjekny zastupowacy wonkowny minister Szymon Szynkowski vel Sęk rozhłosowemu sćelakej Polskie Radio. Pólska je we wójnje třećinu swojeho wobydlerstwa přisadźiła a dźěl swojeho teritorija zhubiła, Szynkowski vel Sęk rjekny.
Čisty paduch: W Sewjerorynsko-Westfalskej je so muž do bydlenja zadobył, zo by dušował. Jako wobydlerka ze swojej dwulětnej dźowku domoj přińdźe, słyšeše wona zwuki z kupjele a steješe před zamknjenymi durjemi. Z pjenjezom móžeše wona durje wotamknyć a wuhlada muža w trochowanej starobje mjez 30 a 40 lětami z trěnjom w ruce. Wón žonje rozłoži, zo chcyše jenož dušować. Žona z bydlenja ćekny a zawoła policiju. Prjedy hač zastojnicy přijědźechu, bě muž preč.
Swinje móža kompjuterowe hry hrać. Tole su wědomostnicy uniwersity Purdure w zwjazkowym staće Indiana w USA zwěsćili. Woni su swinje na to trenowali, z klamu joystick tak posłužować, zo so cursor na wobrazowce na wěste městno pohibuje. Jako myto dawaše chłóšćenku. Fachowcam je to dopokaz, zo su swinje inteligentniše hač dotal myslene.
Washington (dpa/SN). Prawiznicy demokratow w jednanju k wotsadźenju Donalda Trumpa maja bywšeho prezidenta za hłowneho zamołwiteho namócneho nadpada na Kapitol. „Donald Trump je ćežke złóstnistwo přećiwo našej wustawje a našemu ludej skućił“, rjekny najwyši zastupnik demokratow, Jamie Raskin wčera při procesu w Senaće. „Trump njebě přihladowar, wón je namóc naškarał.“ Přiwisnicy Trumpa běchu 6. januara po jeho narěči Kapitol wobsadźili.
Söder: Mjezy wirusa dla zawrěć
Berlin (dpa/SN). Bayerski ministerski prezident Markus Söder (CSU) w boju přećiwo rozšěrjenju koronawirusa zawrjenje mjezy k Čěskej hižo njewuzamkuje. „Njedyrbjała-li Čěska kmana być, swoje nuzowe naprawy podlěšić, dyrbjało jasne być, zo je Čěska mutaciska kónčina a zo je zawrjenje mjezy potom tema, wo kotrejž dyrbimy rěčeć“, rjekny Söder wčera w sćelaku ZDF. To samsne płaći za Awstrisku, hdźež su južnoafrisku wariantu koronawirusa zwěsćili.
Poćahi dale sprostnjene
Praha (dpa/SN). Britiska warianta koronawirusa so w Čěskej dale rozpřestrěwa. Nowe přepytowanja pak su wulke regionale rozdźěle pokazali, kaž statny strowotniski zarjad SZÚ wčera zdźěli. Po tym wučinješe podźěl wulce natykliweje warianty w Trutnovskim wobwodźe w třikrajowym róžku k Pólskej a Sakskej něhdźe 60 procentow wšitkich přepytowanych probow. W susodnym wobwodźe Náchod bě jich 45 procentow. W stolicy Praze wučinješe podźěl britiskeje mutacije mjenje hač dźesać procentow.
Zarjad namołwja, dohladowanje mutacije, štož bě dotal skerje na Prahu wobmjezowane, na cyły kraj rozšěrić. Tež ministerski prezident Andrej Babiš warnuje před strachami noweje warianty korony. „Wirus so na nas měri. Wón je smjertny.“ Politikar je so wčera do Serbiskeje podał, zo by so tam wo nazhonjenjach z ruskim a chinskim šćěpiwom wobhonił.
Berlin (dpa/SN). Wjacore wobswětoškitne zwjazki su wčera wobzamknjene naprawy knježerstwa na dobro překasancow witali. Přihłosowanje signalizowałoj stej mjez druhim Němski přirodoškitny zwjazk Nabu a Zwjazk za wobswět a přirodoškit Němskeje BUND. „Kóždy zalutowany kilogram pesticida a kóždy kwadratny kilometer bjez jědow je pozitiwny za insekty a přirodu“, rjekny předsyda BUND Olaf Bandt. Je prawje, we wěstych škitnych kónčinach wo kooperatiwnych rozrisanjach rozmyslować a ratarjow za škit překasancow mytować, wón rjekny.
Prezident NABU Jörg-Andreas Krüger wita zakaz Glyphosata wot kónca 2023.
Berlin (dpa/SN). Rjemjesło wita planowane wotewrjenje frizerskich salonow, warnuje pak zdobom před wuskutkami podlěšeneho lockdowna za druhe firmy. „Epidemiologisce wopodstatnjene podlěšenje lockdowna je jara wjele wot zawrjenja potrjechenym firmam ćežko brěmjo a hrozy, zo nuzuje mnohich z nich do kolen“, rjekny Hans-Peter Wollseifer, prezident Centralneho zwjazka němskeho rjemjesła wčera po wuradźowanju zwjazkoweje kanclerki Angele Merkel (CDU) z ministerskimi prezidentami zwjazkowych krajow wo dalšim postupowanju přećiwo koronawirusej.
Hospodarskemu zwrěšćenju hodźało so jenož zadźěwać, hdyž připowědźene srědki k přemosćenju krizy potrjechene zawody spěšnje docpěja, tak Wollseifer.
Frizerskim salonam so porno tomu eksistencny strach wozmje. Rozsud tež pomha, ničenju tysacow dźěłowych městnow zadźěwać. Nic naposledk ma Wollseifer wotewrjenje za hódnoćenje wot zawodow zdźěłanych a přesadźenych hygieniskich konceptow.