To a tamne (06.10.20)
Wšo, štož so błyšći, njeje hnydom złoto. To nazhoni nětko tež paduch, po tym zo je so do filiale banki w Bad Herrenalbje zadobył. We witrinje wuhlada wón błyšćatu dulu złota. Na to rozbi masiwnu škleńcu witriny, z čimž je škodu wjacorych tysac eurow zawinił. Kaž so wukopa, pak njejednaše so wo złoto, ale bě to jenož chětro derje wuhotowana atrapa.
Ze swěrnym přećelom so rozžohnować, hač je to kóń abo dalše domjace skoćo, je nětko w Schwäbisch-Hallskim zwěrjećim krematoriju móžno. Po słowach mějićelki pochowanskeho předewzaća Sandry Lutz móža konje swojich wobsedźerjow zdźěla hač do 40 lět přewodźeć. Tak su sej dostojne rozžohnowanje zasłužili. Ludźo poskića ludźom tež wosebite popjelnicy, samo w formje sedła. Dokelž za zwěrjata winowatosć pochowanja njewobsteji, smědźa sej ludźo jich popjeł zdźeržeć abo jón na lubowanym městnje roztrusyć.
Poćah ke Chrystusej rozsudny
Saratow (B/SN). Clemens Pickel je wot lěta 1990 romsko-katolski měšnik w sowjetskim, dźensa ruskim Saratowje. „Moje městno je tu w Ruskej, tu mje trjebaja“, wón měni. A dźěła ma tam nadosć. Bamž Jan Pawoł II. pomjenowa jeho 1998 na biskopa, wot lěta 2002 nawjeduje wón biskopstwo swj. Clemensa w južnej Ruskej, kotrež je tak wulke kaž Portugalska, Španiska, Francoska a Němska hromadźe. Na 25 městnach bydli a skutkuje 44 duchownych, a woni staraja so wo 20 000 wěriwych. „Rozsudny je poćah ke Chrystusej“, 59lětny wuswětla, „dołhož móžu, chcu ludźi wučić so modlić, bychu-li zaso jónu bjez měšnika žiwi być dyrbjeli.“ Wot lěta 2017 je Pickel tež předsyda Ruskeje biskopskeje konferency.
Prašeja so za Bohom
Wuradźuja wo etaće
Drježdźany (dpa/SN). W Drježdźanskej statnej kencliji je so knježerstwo dźensa k swojej etatowej klawsurje schadźowało. Hladajo na nowy dwójny hospodarski plan za lěće 2020/2021 su zaměry a předewzaća tež hladajo na koronapandemiju rozjimali. W minjenych tydźenjach běchu frakcije koalicije hižo prioritne lisćiny zestajeli. Na wuradźowanju kabineta w juniju so sakske knježerstwo na to dojedna, etat na dotalnym niwowje planować. Braniborska financna ministerka Katrin Lange (SPD) je dźensa za klětuši etat wjetše nowozadołženje namjetowała, a to tři město 1,9 miliardow eurow.
Von der Leyen w karantenje
Brüssel (dpa/SN). Prezidentka komisije EU Ursula von der Leyen je so do korona-karanteny podała. Zašłu wutoru měješe wona zhromadny termin z wosobu, kotraž bu wčera pozitiwnje testowana. Štwórtk drje bu von der Leyen negatiwnje testowana, nětko pak chce so znowa testować dać a so hač do jutřišeho izoluje. Minjenej štwórtk a pjatk wobdźěli so wona na wjeršku statnych a knježerstwowych šefow EU, hdźež bě tež zwjazkowa kanclerka Angela Merkel (CDU).
Wjace infekcijow w Braniborskej
Podstupim (dpa/SN). W Braniborskej ličba natyknjenych z koronawirusom dale přiběra. Minjeny štwórtk a pjatk su tam 40 nowych wobkrućenych padow zličili. Jeničce we wokrjesu Podstupim-Srjedźna marka su dwanaće nowonatyknjenjow zwěsćili, we wokrjesu Dubja-Błóta wosom a w Havellandskim wokrjesu štyri. Minjenu srjedu bě jich 37 padow. Najwjetšu ličbu infekcijow mějachu tam pjatk tydźenja z 42 padami.
Wot měrca su w Braniborskej cyłkownje 4 383 koronainfekcijow zwěsćili. Pjatnaćoch tuchwilu w chorownjach lěkuja. Krajne knježerstwo planuje razniše prawidła za priwatne swjedźenje. Předwidźanej stej hornjej hranicy 50 wosobow za swjedźenje w zjawnych abo wotnajatych rumnosćach a 25 wosobow na swójbnych swjedźenjach, jeli ličba nowych infekcijow na 35 padow mjez 100 000 wobydlerjemi rozrosće. Krajne knježerstwo chce jutře wo tym wuradźować.
Hotele dale ćerpja
Berlin (dpa/SN). Hotele, předewšěm w Berlinje, koronapandemije dla dale ćerpja a nimaja wuhlady na polěpšenje. To je hłowny jednaćel zwjazka hotelow a hosćencow Thomas Lengfelder minjeny pjatk w Berlinje zdźělił. Wón liči ze žołmu insolwencow, dyrbjało-li połoženje wostać, kajkež je. Jenož w septembrje su hotelownicy 70 procentow mjenje dochodow měli hač loni w samsnym času.
Z wulkim brjušebolenjom zhladuje Lengfelder na bližacy so chłódny počas z mjenje turistami. Tež wiki, kongresy a zawodowe swjedźenje žane njejsu. „To so kriza hotelow dale přiwótřa.“
Tež wjele kritiskich hłosow
W Sakskej Dźeń němskeje jednoty na wjacorych městnach woswjećili
Drježdźany (dpa/SN). Z koncertami a rozmołwami ze swědkami časa je Sakska na mnohich blakach 30. róčnicu zjednoćenja Němskeje woswjećiła. Nimo wjesela historiskeho podawka dla pak jewješe so tež wjele kritiskich hłosow.
Na swjedźenskim zarjadowanju w Sakskim krajnym sejmje wobžarowaše prezident Matthias Rößler, zo njebě wjele zapósłancow přitomnych. Pozadk toho bě přeprošenje dwělomneho politikarja CDU Arnolda Vaatza jako swjedźenskeho rěčnika. Nimo Lěwicy njeběchu tež zapósłancy SPD a Zelenych na sobotne zarjadowanje přišli. Vaatz bě njedawno w zwisku z antikorona-demonstraciju Berlinskej policiji NDRske metody wumjetował.
To a tamne (05.10.20)
Irske sudnistwo ma sandwichi předewzaća Subway za słódkosć, dokelž wobsahuje wužiwany chlěb wjele wjace cokora hač předpisane. Tak njesłuša wudźěłk k zakładnym cyrobiznam a njeje hižo wot wobrotoweho dawka wuzamknjeny. Subway drje dale twjerdźi, zo přewjele dawka w Irskej płaći, rozsud sudnistwa pak je jasny. Swoje recepty ameriski žiwidłowy koncern tak jednorje změnić njemóže, wšako ma stejnišća we wjac hač 100 krajach po cyłym swěće.
Holly, Chunk abo Jumbo Jet, štó z cyłkownje 14 ćežkich požadarjow wubědźowanje jako najrjeńši mjedwjedź dobudźe. Holly z narodneho parka w Alasce bě sej loni titul kralowny zawěsćiła. Lětuša konkurenca pak je chětro wulka. K zazběhej t. mj. „Fat-bear“-tydźenja je hižo 140 000 fanow mjedwjedźow swój hłós wotedało. Dobyćerja jutře postaja.
Na sankcije so dojednali
Brüssel (dpa/SN). Po tydźenje trajacej blokadźe je so Europska unija tola hišće na sankcije přećiwo Běłoruskej wólbneho wobšudnistwa a namocy dla dojednała. Cypern bě minjenu nóc swój weto wróćo sćahnył a za to hladajo na Turkowsku wšelake přilubjenja dóstał. EU hrozy Turkowskej ze sankcijemi, spyta pak dale z njej jednać. Cypern a Turkowska wadźitej so zemskeho płuna w namjeznej mórskej kónčinje dla.
Zeleni płunowód wotpokazuja
Drježdźany (dpa/SN). Sakscy Zeleni steja ze swojim wotpokazowacym stejišćom nastupajo płunowód Nord Stream 2 w krajnym sejmje chětro izolowani, štož wjedźe mjeztym samo k napjatosćam w knježerstwowej koaliciji CDU, SPD a Zelenych. Wobswětowy minister Wolfram Günther (Zeleni) je so wčera w krajnym sejmje jasnje přećiwo pipelinje wuprajił. Porno tomu staj ministerski prezident Michael Kretschmer (CDU) kaž tež hospodarski minister Martin Dulig (SPD) za płunowód.
Wočakuja žołmu plajtow
