Inženjerka Iman Behabi steji ze sylzami we wočomaj w swojim ...
Wurjadny wjeršk EU wuradźuje wo Běłoruskej
Minsk (dpa/SN). Opozicija w Běłoruskej chce hladajo na dny trajace masowe protesty stawki w bywšej sowjetskej republice rozšěrić. Po tutym puću chcedźa mócnarski aparat wosłabić a prezidenta Aleksandera Lukašenka nuzować wotstupić, zdźěli Maria Moros, nawodnica wólbnobojoweho mustwa opozicije Swetlany Tichanowskeje. „Wujasnimy knježacym, zo njeje žanoho puća wróćo k starym poměram.“ Po wšěm kraju ludźo hižo dlěje hač tydźeń demonstruja, žadajo sej wotstup Lukašenka.
Tón je wčera spytał, ze stawkowacymi dźěłaćerjemi traktoroweje twornje w Minsku do rozmołwy přińć. Dźěłaćerjo pak jeho wuhwizdachu a namołwjachu, so zminyć. Wopyt bě spěšnje skónčeny.
W Čěskej trjebaja zaso nahubniki
Praha (dpa/SN). Čěska zawjedźe po wšěm kraju zaso winowatosć, nahubniki wužiwać, po tym zo běchu ju před měsacomaj zběhnyli. Wot 1. septembra dyrbja ludźo znutřka wobchodowych rumnosćow, institucijow a w zjawnych wobchadnych srědkach škit před hubu a nosom nosyć. Hłowna přičina je kónc lětnich prózdnin a započatk noweho šulskeho lěta, rjekny minister za strowotnistwo Adam Vojtěch w Praze. Budźe wo wjele wjace kontaktow mjez ludźimi a na to dyrbimy reagować.“
Poprawom bě Praske knježerstwo regionalnje rozdźělnu tak mjenowanu korona-amplu zawjedło, zo móhło fleksibelnje w potrjechenych kónčinach reagować, bjez toho zo wobmjezowanja za wšón kraj wukaza. Mjeztym pak maja wot spočatka koronapandemije wjace hač 20 000 infekcijow, strowotniske ministerstwo zdźěla.
Nětkole bu znate, zo je so na kwasnej hosćinje njedaloko města Uherské Hradiště na juhowuchodźe kraja dźesatki ludźi z koronawirusom natyknyło.
CDU na terminje wobstawa
Křesćanscy demokraća přihotuja najebać koronu zjězd w decembrje
Berlin (dpa/SN). Prezidij CDU chce najebać přiběrace ličby z koronawirusom natyknjenych ludźi spočatk decembra planowany stronski zjězd k wuzwolenju noweho předsydy w Stuttgarće přewjesć. Tuchwilu pandemije dla wjacore scenarije rozwažuja a planuja, wčera ze stronskich kruhow rěkaše. Zwjazkowa kanclerka Angela Merkel (CDU) mjenowaše najnowše ličby koronainfekcijow „přičinu k starosćenju, ale wobknježomne“. Tuž njeje po jeje měnjenju móžno, dalše wobmjezowanja zběhnyć. To płaći wosebje tež za koparske hry.
Ličby koronainfekcijow běchu naposledk zaso přiběrali. Kónc minjeneho tydźenja bě Roberta Kochowy institut wšědnje wjace hač 1 400 nowych infekcijow registrował.
Poselstwo měra z Choćebuza
To a tamne (18.08.20)
Šěsćlětneho kolesowarja na awtodróze zadźeržała je kanadiska policija. Šoferojo běchu policiju informowali, zo je mały kolesowar z nahłownikom na pobóčnej čarje highwayja 403 z města Hamilton do Toronta po puću. Zastojnicy jeho spěšnje nadeńdźechu. Hólc rjekny, zo je po puću wot wowki k swojej maćeri. Policisća so dźiwachu, zo jědźeše hólc do praweho směra na nimale 70 kilometrow dołhej čarje mjez woběmaj městomaj.
Lochkomyslnosć dweju młodostneju ze Sakskeje je na Rujanach zasadźenje pomocnikow zawinowała. 18- a 19lětnaj dowolnikaj chcyštaj póndźelu pola Sassnitza po 70 metrow hłubokej nahłej skłoninje dele lězć. Při tym so 19lětny wotsuny a móžeše so 60 metrow wysoko w strašnym połoženju runje hišće hałzy dodźeržeć. Wjace hač 20 pomocnikow z helikopterom jeju wuchowa.
Posrědkuje na Bliskim wuchodźe
Vatikan (B/SN). Pietro Parolin, 65lětny kardinalny sekretar Vatikana, je so aktiwnje do konflikta na Bliskim wuchodźe zašaltował, schadźujo so z posołami Israela a USA. Kardinalny sekretar zwurazni starosć bamžowskeho zarjada hladajo na „ćežku situaciju“. Israelske knježerstwo planuje dźěle palestinskeho regiona wobsadźić. Parolin je přećiwo tajkemu „jednostronskemu postupowanju, štož jednanja wo měr na Bliskim wuchodźe nimoměry poćežuje. Israel kaž Palestina matej prawo na swoju eksistencu.“
Što rěkatej amen a haleluja
Bonn (B/SN). Wjele słowow ze Swjateho pisma pochadźa z hebrejšćiny abo grjekšćiny. Słowo „amen“, pola ewangelskich Serbow „hamjeń“, wužiwaja, dźensa tež w zjawnym žiwjenju po cyłym swěće, bjez toho zo jeho woznam znaja. Słowo je wotmołwa na Chrystowy paćer a je ze židowskeje tradicije přewzate. Wone woznamjenja telko kaž „tak njech je“. Wopřijeće pochadźa ze židowsko-křesćanskeje tradicije a rěka: „Chwalće Boha“. Słowo steji často na spočatku abo na kóncu psalmow. Z wopřijećom „haleluja“ křesćenjo ze słowom w ewangeliju přitomneho Chrystusa česća.
Scholz za jasny signal
Berlin (dpa/SN). Zwjazkowy financny minister Olaf Scholz (SPD) je namjetował, wupłaćenje krótkodźěłoweho pjenjeza wot dwanaće na 24 měsacow podlěšić. Koronakriza so přichodne tydźenje njezminje, rjekny wón nowinarjam. „Předewzaća a přistajeni trjebaja jasny signal knježerstwa: Dźemy z wami wšón puć přez krizu, zo njetrjebał nichtó po puću dźěło zhubić“, Scholz praji. Ličba ludźi w krótkodźěle je so mjeztym na 6,7 milionow zwyšiła, Agentura za dźěło zdźěla.
Spahn: Swjedźenje strašne
Berlin (dpa/SN). Zwjazkowy minister za strowotnistwo Jens Spahn (CDU) warnuje hladajo na přiběrace ličby koronainfekcijow před swjedźenjemi jako žórło natyknjenja. Je wjace infekcijow nawróćacych so dowolnikow dla, rjekny Spahn w powěsćach sćelaka ZDF. Mamy pak tež lokalne wudyrjenja, kotrež zwisuja zwjetša ze swjedźenjemi. Spahn chcył so z krajemi wo tym dorozumić, kelko ludźi směli so na zarjadowanjach wobdźělić.
Zjězd Demokratow zahajeny
Zeleni přećiwo złahodnjenju chłostanjow
Stuttgart (dpa/SN). W zwadźe wo noworjadowanje nadróžneho zakonika nochcedźa Zeleni wot zwjazkoweho ministra za wobchad Andreasa Scheuera (CSU) žadane złahodnjenje planowanych raznych chłostanjow akceptować. Wot Zelenych nawjedowane wobchadne ministerstwa Badensko-Württembergskeje, Berlina, Bremena, Hamburga a Hessenskeje su minjeny pjatk připowědźili, zo chcedźa spočatk septembra we wobchadnym wuběrku Zwjazkoweje rady wotpowědnu próstwu zapodać, po kotrejž maja hižo wujednane, formelneho zmylka pak tuchwilu zběhnjene razniše chłostanja płaćiwe wostać. Korigować měł so jeničce formalny zmylk.
Pozadk toho je poprawom wot Zwjazkoweje rady wobzamknjena změna nadróžneho zakonika. Tón předwidźi mjez druhim měsac płaćiwy zakaz jězdźenja po snadnišim překročenju wukazaneje spěšnosće, hač tomu dotal bě. Formelneho zmylka dla je zakoń tuchwilu zběhnjeny. W Zwjazku a mjez krajemi nětko debatuja, kak měło dale hić. Scheuer bě sej žadał, razniše chłostanja zaso złahodnić.
Připowědźa strategiju wody dla
Berlin (dpa/SN). Hladajo na suche lěća minjenych lět a tuchwilu pobrachowacu wodu dla žada sej ministerka za wobswět Svenja Schulze nowe myslenje nastupajo rozdźělenje wody. Wužiwanje wody žada sej nuznje krutu hierarchiju a nowe prawidła, rjekny politikarka SPD nowinarjam. Najwažniše je zastaranje ludźi z wodu k piću, warjenju a myću. „To je čłowječe prawo.“ Potom pak je wěc hižo napjata, rjekny Schulze. Jako přikład mjenowaše wona prašenje, hač měła so najprjedy měšćanska kupjel zawrěć abo hač ludźom zakazaja, zahrodki krjepić. Schulze na to skedźbni, zo dyrbja tež w přichodźe zamołwići w komunach wo tym rozsudźić. Wona chcyła k tomu klětu narodnu wodowu strategiju předpołožić, zo by lokalnym institucijam jasne směrnicy a orientacije w tymle prašenju do ruki dała.
Suchota tež ratarjow starosća, dokelž nimaja z městnami hižo dosć picy za skót. Deficitow minjeneju lět dla drje su škody lětušeje suchoty dla hišće hórše hač 2018 a 2019, zwjazk ratarjow zdźěla. Lokalny dešć tole wjace njenaruna.
