Sydła z parkowaneho awta pokradnyli su njeznaći w Zwickauskej bydlenskej štwórći. Woni běchu so na dotal njeznate wašnje do zamknjeneho awta zadobyli. Tam wutwarichu sydło šofera, sobujě­duceho kaž tež zadnju ławku a so zmi­nychu. Policija pyta nětko swědkow, kotřiž su kuriozne padustwo wobkedźbowali abo wědźa, hdźe su sydła wostali.

Wosrjedź operacije mozow na prěčnej fleće hrała je pacientka w awstriskim Grazu. Rusowka Zofija Pinajewa hudźeše kruchi Mozarta, Bacha a Prokofjewa, jako jej lěkarjo tumor z mozow wotstronichu. Za nich bě mały koncert premjera. OP z wotućenym pacientom je jenička móžnosć, telko tumora kaž móžno wotstronić a při tym wobkedźbować, hač su wšitke mozowe funkcije pacienta w porjadku. Fletistka wšak njebě ze sobu cyle spokojom, dokelž bě so jónu zahrała.

Ettlingen. Při ćežkej zražce busa z wotpadkowym awtom na awtodróze A 5 pola Karlsruhe je dźensa skupina seniorow z Bayerskeje znjezbožiła. Zwotkel běchu pućowacy přijěli, nochcyše policija rjec. Při njezbožu je žona žiwjenje přisadźiła, dalšej wosobje so ćežko zraništej. 29 sobujěducych poćerpje lóše zranjenja. Nje­zbožo sta so rano při wotbóčce Ettlingen/Karlsruhe-Rüppurr. Přičinu zražki policija tuchwilu přepytuje.

Nochcedźa z Turkowskej jednać

Luxemburg (dpa/SN). Dwaj dnjej po znowawuzwolenju turkowskeho prezidenta Recepa Tayyipa Erdoǧana su kraje EU oficialnje wobzamkli, zo njebudu z krajom najprjedy raz wo wutwarje cłowneje unije jednać. Turkowska je so minjeny čas wot Europskeje unije zdalowała, rěka w stejišću ministerskeho zetkanja. Přede­wšěm popušćaca prawostatnosć, pohubjeńšace so zakładne prawa a swoboda měnjenja su přičina so starosćić.

Wjele schorjenych na „Lifeline“