Peking (dpa/SN). Z iritacijemi započa so dźensa wopyt hospodarskeho ministra Sigmara Gabriela (SPD) w Chinje. Njewočakowano je chinski hospodarski minister Gao Hucheng po rozmołwje z Gabrielom swoje wobdźělenje na posedźenju němsko-chinskeho hospodarskeho wuběrka wotprajił. Pozadk njedorozumjenjow je hněw Chiny, dokelž je so Němska wospjet přećiwo tomu wuprajiła, zo chinske firmy němske wysokotechnologiske předewzaća pokupja. Wiceminister Gao Yan, kiž hospodarskeho ministra we wuběrku zastupowaše, skoržeše na „přećiwo inwesticijam měrjacu so naladu w Němskej“. Hladajo na wotprajenje chinskeho ministra so tež Gabriel na posedźenju wuběrka njewobdźěli, na čož zastupnicy hospodarstwa ze zadźiwanjom reagowachu, kaž dpa rozprawja.

Dotal njesłyšana gesta bamža Franciskusa w Šwedskej bjezdwěla do cyrkwinskich stawiznow zańdźe: Prěni króć je bamž zhromadnje z ewangelskimi wěriwymi swjatočnosće wulkeje 500lětneje róčnicy reformacije zahajił a so za to wuprajił ekumeniske prócowanja zesylnić, zo by so zhromadne přijeće swjateje eucharistije katolskich a ewangelskich wěriwych zmóžiło. Bamž derje wě, zo njezměje w tymle prašenju tež w swójskich rjadach jeno přiwisnikow. Wón pak runje tak derje wě, zo njeje hladajo na raznje woteběracu ličbu wěriwych předewšěm w Europje žaneje alternatiwy, hač mocy křesćanskeje cyrkwje zjednoćić. A zdawa so, zo chcył wón tym, kotřiž hladajo na „islamizaciju“ Europy najhórše scenarije apokalypsy moluja, to přiwołać, štož je kanclerka Angela Merkel w tym zwisku stajnje zaso prajiła: „Nimamy přewjele islama, ale přemało křesćan- stwa.“ Marko Wjeńka

Rom (dpa/SN). Zemja w Italskej njepřińdźe k měrej: Dalše sylne zemjerženje je dźensa rano tak a tak hižo zapusćenu kónčinu znowa střasło. Zemski dyr měješe po informacijach italskich seismologow sylnosć 4,7. Rženja dla so dalše twarjenja sypnychu, zdźěli wjesnjanosta wsy Ussita Marco Rinaldi. Wjes bu wčera při zemjerženju sylnosće 6,5 zničena. Tež w susodnym Castelsantangelo sul Nera rozprawjeja wo nowych škodach: „Tule je so wšitko sypnyło. Štož hišće steji, njeje hižo stabilne“, rjekny wjesnjanosta Mauro Falcucci. Ludźo trjebaja nuznje pomoc.

Wopačny urin při policajskej kontroli wotedał je pod wliwom drogow stejacy młodostny pola Mnichowa. 19lětny zawostaji mjez zastojnikami zamyleny zaćišć, test urina pak ničo njewunjese. Při přepytowanju muža wšak zastojnicy zwěsćichu, zo bě tón na tajke kontrole přihotowany: W zaku jeho cholowow nańdźechu dalšu blešku cuzeho urina, nimo toho krjepki, kotrež maja funkciju pupilow normalizować. Dokelž namakachu tež marihuanu, sćazachu klučiki awta a jězbnu dowolnosć 19lětneho.

Něhdźe 250 wobdźělnikow je w hessenskim Wächtersbachu na najnaročnišim marathonowym běhu wobdźěliło. Tak dyrbjachu štomy ćahać a tójšto zadźěwkow přewinyć, při čimž mějachu tež zmužitosć dopokazać: Suwanje z dźesać metrow wysokeje błóćaneje hórki skónči so w lódzymnej wodźe.