Njebjelčicy (SN/JaW). Towarstwo Smy wobskorži Załožbu za serbski lud. To wuchadźa z nowinskeje zdźělenki Serbskeho sejma, kiž je sobotu wuradźował. Za přičinu mjenuje rěčnica Serbskeho sejma Jadwiga Pjacec, zo njedóstanje towarstwo za spěchowanje „politiskeho dźěła demokratisce woleneho powšitkowneho serbskeho sejma“ a wudźeržowanje běrowa ze stron załožby žane spěchowanje. Kónc lěta 2020 zapodata próstwa bu „nětkole ze spřećiwjenskej zdźělenku doskónčnje wotpokazana“, rěka w spisu.

„Załožba njespěchuje po wustawkach a objektiwnych kriterijach, ale po dobro­zdaću mało wosobow jenož wubrane serbske towarstwa a institucije. W bohatej ličbje su statne studije zwěsćili, zo wobsteja bytostne demokratiske a skutkownostne deficity dotalneje plećizny serbskich institucijow. Wočakujemy, zo dóńdźe před sudnistwom k wujasnjenju, što su přičiny, kiž njejsu so dotal ani we wotmołwje, ani w spřećiwjenskej zdźělence mjenowali. Wo tajkim njeznjesliwym stawje mamy skónčnje zjawnje diskutować!“, zwurazni předsydka Smy Aneta Zahrodnikowa.

Greifswald (dpa/SN). Ministerscy prezidenća wuchodoněmskich zwjazkowych krajow su so dźensa w Mecklenburgsko-Předpomorskej k swojej prawidłownej konferency zešli. Při zetkanju na małej kupje Riems w Baltiskim morju chcychu w prěnim rjedźe wo zaručenju zastaranja ludźi z energiju a wo ekstremnym zwyšenju kóštow za přetrjebarjow rěčeć. Razne zwyšenje płaćiznow ludźi na wuchodźe wosebje starosća, hdźež su dochody často snadniše a puće na dźěło dlěše.

Macron jara snadnje dobył

Paris (dpa/SN). W prěnim kole wólbow parlamenta w Francoskej su so kandidaća lěhwa prezidenta Emmanuela Macrona z přewšo snadnym předskokom přećiwo nowemu lěwicarskemu lěhwu přesadźić móhli. Po dotalnym wuslědku je sej zwjazk Macrona 25,75 procentow hłosow zdobył, wot politikarja Lěwicy Jeana-Luca Mélenchtona nawjedowany zwjazk Lěwicy, Komunistow, Zelenych a Socialistow dósta 25,66 procentow. Wólbne wobdźělenje bě ze 47,51 procentami hišće niše hač před pjeć lětami.

Bórze wjace atomowych bróni

Berlin (dpa/SN). Ukrainski wulkopósłanc w Němskej Andrij Melnyk wočakuje wot zwjazkoweho kanclera Olafa Scholza (SPD), zo na swojim wopyće w Kijewje přewostajenje němskich tankow Ukrainje přilubi. „Bjez ćežkich němskich bróni so nam bohužel njeporadźi, hobersku wojersku přewahu Ruskeje přewinyć a žiwjenje wojakow a ciwilistow wuchować“, rjekny Melnyk powěsćerni dpa. „Ukraina wočakuje, zo zwjazkowy kancler Olaf Scholz na swojim wopyće w Kijewje nowy pomocny paket bróni za Kijew přilubi, kiž wobsahuje na kóždy pad hnydom k dispoziciji stejace bojowe tanki Leopard 1 a třělcowske tanki Marder.“

Po njewobkrućenych informacijach medijow chce so Scholz hišće tutón měsac zhromadnje z francoskim prezidentom Emmanuelom Macronom a italskim ministerskim prezidentom Marijom Draghijom do Kijewa podać.

Berlin (dpa/SN). Frakcija unije w zwjazkowym sejmje žada sej hnydomnu perspektiwu přistupa Ukrainy, Moldawskeje a Georgiskeje k Europskej uniji. Zwjazkowe knježerstwo měło so za to zasadźić, zo tutym krajam hižo na posedźenju Europskeje rady 23. a 24. junija status přistupnych kandidatow přizwola. „Je w našim zajimje, Ukrainje, Moldawskej a Georgiskej puć do Europskeje unije runać“, rjekny Gunther Krichbaum, europapolitiski rěčnik frakcije powěsćerni dpa.

Unija chce zwjazkowe knježerstwo tež namołwić, we wobłuku přistupneho procesa potrjechenym krajam nowe formy wobdźělenja na programach abo w gremijach wonkowneje, wěstotneje abo zakitowanskeje politiki Europskeje unije wotewrěć. To płaći tež za wobłuki slědźenje, energija, wobchad abo škit klimy. Za to pak měli kandidaća konsekwentnje wšitke kriterije demokratije, čłowjeskich prawow a prawnostatnosće spjelnić a z wotmachom přećiwo korupciji wojować. Nimo toho měli wobzamknjenja EU nastupajo zhromadnu wonkownu a wěstotnu politiku zwoprawdźić.