Budyšin (SN/bn). Knižna premjera přiručki Trudle Malinkoweje „Serbske pomniki – Přewodnik po serbskich wopomnišćach“ bě tež publikaciju wudawacemu Ludowemu nakładnistwu Domowina wosebitosć. „Je to prěni raz, zo mamy knihu wo mjeztym 150lětnym serbskim pomnikarstwje w poskitku“, podšmórny lektor wudaća a moderator wječora Michał­ Nuk wčera w Budyskej Smolerjec kniharni. „Kompendij Jurja Młynka samsneho titula z lěta 1965 bě tehdy Domowina wudała, a to we wotrjedźe propaganda a agitacija“, Nuk konkretizowaše a zjima „ćežki porod“ publikacije: „W minjenych lětach bě často žadane, knihu Młynka aktualizować, naše wopomnišća inwentarizować a dokumentować. Dźakowano Maćicy Serbskej, Serbskemu institutej a wosebje wězo Trudli Malinkowej přewodnik nětko předleži – z porno Młynkej potrojenej ličbu pomnikow.“

Dźensa před 70 lětami bě w Bonnje wozjewjeny Zakładny zakoń Němskeje płaćiwosće nabył. Swój zakład ma we wukazu třoch zapadnych wojerskich guwernerow z 1. julija 1948 ministerskim prezidentam tehdyšich jědnaće zwjazkowych krajow w zapadnym wobsadniskim pasmje, zwołać za 1. september zhromadźi­znu, zo bychu demokratisku wustawu za federatiwnu republiku zdźěłali. Parlamentariskej radźe, kotraž započa w naležnosći dźěłać, přisłušeše 65 zapósłancow krajow a pjeć zapósłancow Berlina (tući pjećo pak jeno z poradźowacym hłosom, dokelž kontrolowachu město wšitke štyri dobyćerske mocy). Po zdźěla ćežkich jednanjach je rada „Zakładny zakoń Zwjazkoweje republiki Němskeje“ 8. meje 1949 ze 53 přihłosowanjemi a dwanaće­ wotpokazanjemi přiwzała. Po tym zo běchu nowemu zakonjej krajne parlamenty kaž tež wojerscy guwernerojo přihłosowali, jón Konrad Adenauer – pozdźiši zwjazkowy kancler – 23. meje 1949 w Bonnskej Pedagogiskej akademiji wuwoła.