Aus der aktuellen Ausgabe vom Freitag, 17 November 2017

Baćoński wosadny farar Gerat Wornar, bywši wjelelětny šefredaktor tydźenika Katolski Posoł, awtor a prěni lawreat Zejlerjoweho myta, swjeći dźensa pjećasydomdźesaćiny. Jubilar je 39 lět z jara woblubowanym duchownym w swojej prěnjej farskej wosadźe, w kotrejž bu 1978 do dušepastyrskeje słužby zapokazany.

Jubilar narodźi so 17. nowembra 1942 jako najmłódši z dźesać dźěći pobožnej žiwnosćerskej swójbje w Starej Cyhelnicy. Na Budyskej Serbskej wyšej šuli rozsudźi so za studij katolskeje teologije a bu 1968 w Drježdźanach na měšnika wuswjećeny. W domjacej Chróšćanskej cyrkwi swje­ćeše primicu. Jako kapłan słužeše najprjedy šěsć lět w Ralbicach, po tym dwě lěće w Chrósćicach a dalšej lěće w Kulowje. Zdobom bě w tym času młodźinski dekanatny dušepastyr, skutkowacy w zmysle nastorkow Druheho Vatikanskeho koncila.

Štož bě Worklečanska gmejnska rada loni k 100. posmjertnym narodninam Jurja Brězana wobzamknyła, je so zwoprawdźiło. We Worklecach maja nětko po spisowaćelu pomjenowanu šćežku. Wona wjedźe wot šule nimo Handrikec hata hač do Hornjeho Hajnka. Wčera su wotpowědne taflički tule při šuli, při Handrikec haće a w Hornim Hajnku připrawili. Žuričan Joachim Lipič je taflički z napisom „šćežka Jurja Brězana“ dwurěčnje a ze serbskim lipowym łopješkom wuhotował. Zastupjerjo gmejny wčera na to dopominachu, zo bě Jurij Brězan často po tymle pućiku chodźił. Foto: Feliks Haza

W zymskich měsacach přewjedźene zarjadowanja w Chróšćanskej putniskej hospodźe su dotal stajnje dobry wothłós mjez wopytowarjemi žnjeli. Jutře za dwaj tydźenjej zahaji putniska mać Monika Gerdesowa mjeztym hižo sedmu kulturnu zymu w swojim domje.

Chrósćicy (SN/MWj). Dwanaće najwše­lakorišich zarjadowanjow wopřijima kulturna zyma 2017/2018 w Chróšćanskej putniskej oazy Moniki Gerdesoweje. „Ideje za to cyłe lěto zběram. Wot spočatka septembra program potom konkretnje zestajam“, praji putniska mać. Jej je dobra měšeńca mjez putniskimi přednoškami, čitanjemi, a hudźbnymi zarjadowanjemi wažna. Při tym kedźbuje tohorunja na serbskorěčne poskitki. Za němske přednoški zdobywa zwjetša putnikow, kiž běchu w běhu lěta pola njeje załožili a kotřiž tajke přednoški tež dru­hdźe přewjeduja.

Zejicy/Smjerdźaca. Z pomocnymaj akcijomaj podpěrujetej Towarstwo Cyrila a Metoda (TCM) kaž tež Towarstwo swj. Filomeny socialne projekty w Pólskej, Čěskej­ a Bołharskej. Po tym zo běchu Chróšćanscy wosadni lětsa dom za samostejace žony z dźěćimi w pólskim Ełku­ wopytali, jón TCM w swojej lětušej dohodownej akciji podpěruje. Za tónle dom proša wo drastu, črije, hygienowe artikle, kosmetiku, płokanski próšk, kuchinske graty a pampersy za dźěći. Wo­tedać hodźi so wšitko dźensa hač do 18 hodź. a jutře, sobotu, wot 9 do 12 hodź. w Zejicach pola Špitankec. Runje tak witane su pjenježne dary, za kotrež wustaji TCM darowansku kwitowanku.

W jednoswójbnym domje w Žornosykach blisko Bukec je dźensa w nocy woheń wudyrił.­ Wobydler bě to krótko po jednej pytnył a hišće sam hašeć spytał. Jako wohnjowi­ wobornicy přijědźechu, sapachu płomjenja hižo z woknow domu. Wodu dyrbjachu přez dołhe hadźicy sem klumpać. Za hašenje přidatnje poćežowaca bě drjewjana fasada domskeho, kotreježdla so płomjenja spěšnje rozpřestrěwachu, na kóncu­ tež z třěchi sapachu. Hakle wokoło štyrjoch bě woheń pod kontrolu. Wosebje­ tragiske: Dom běchu hakle spočatk lěta saněrowali. Foto: Toni Lehder

Budyšin. Na dźěćace popołdnjo pod hesłom „Abrakadabra“ přeproša Budyski Serbski muzej jutře, sobotu. W 16 hodź. dožiwja tam mali wopytowarjo Smjerdźečanskeho kuzłarja Gerata Róbla. Tomu přizamknje so małe wodźenje po wustajeńcy „KRABAT – Muž – Mytos – Marka“. W 17 hodź. pokazaja serbski trikowy film „Sedmy rapak“. Zastup płaći za dorosćenych pjeć eurow, potuńšene 2,50, swójbny lisćik dźesać eurow.

Na gospelowy oratorij

Budyšin. „Our father in heaven“ rěka gospelowy oratorij, kotryž předstajitej ewangelske kantorstwo swj. Pětra a orchester Serbskeho ludoweho ansambla srjedu, 22. nowembra, a sobotu, 25. nowembra, stajnje w 17 hodź. w Budyskej Marje-Marćinej cyrkwi. Pod nawodom cyrkwinskeho hudźbneho direktora Michaela­ Vettera zaklinči sinfoniska twórba, wopřijaca elementy bluesa, swinga a gospela. Wobjednawa so sa­motnosć čłowjeka pod wužiwanjom bibliskich tekstow. Zastup je darmotny, pjenježny­ dar je witany.

Pozadki nuzoweho rozsuda a zarjadniske šmjaty wujasnjene

Róžant (JK/SN). Wospjet zaběrachu so radźićeljo gmejny Ralbicy-Róžant na wčerawšim posedźenju w Róžeńće z pozadkom a wobstejnosćemi, kotrež běchu k tomu wjedli, zo je gmejna znapřećiwjenje přećiwo planowanemu rozšěrjenju Ralbičanskeje kormjernje swini cofnyła.

Zražka na křižowanišću

Bolborcy. K njelubemu zetkanju dweju wosoboweju awtow je zawčerawšim popołdnju na křižowanišću w Bolborcach dóšło. 71lětna wodźerka Audija bě tam ze Smochčanskeho směra přijěła a po wšěm zdaću předjězbu 55lětneje šoferki Opela njewobkedźbowała. Zražka bě tak mócna, zo so Opel z jězdnje suny a do sćěny domskeho prasny. Na twarjenju nasta něhdźe 10 000 eurow škody. Wobě žonje so snadnje zraništej. Na jeju jězdźidłomaj nasta dohromady dalšich 10 000 eurow wěcneje škody. Wobškodźene twarjenje dyrbješe statikar přepruwować. Wo wuslědku jeho posudka dotal ničo znate njeje.

Na wopyće pola słowakskeho hudźbnika Jaroslava Pukača w Choćebuzu

Znaju jeho jako wjesołeho, žortni­weho a temperamentneho muža. Po cyłym swojim wašnju skutkuje wón młody, byrnjež w aprylu 70. narodniny swjećił. Tutu wjesołosć je sej Słowak Ja­roslav Pukač přez lětadołhe skutkowanje jako hudźbnik a kulturnik nasrěbał. Hudźenje­ a spěwanje stej jeho element, jeho radosć a eliksěr žiwjenja.

Nowostka Ludoweho nakładnistwa Domowina „Z Francom po swěće“

Je lědma někoho w Serbach, kiž jeho njeznaje, wandrowskeho Franca Čornaka, kiž bě tři lěta a něšto dnjow po puću, zo by so w swojim rjemjesle wukmanił a žiwjenske nazhonjenja zběrał. Dotal je wón čitarjow z knihu Franz im Glück, kotruž bě lěta 2015 ze žurnalistom Rainerom Schäferom napisał, jenož němsce do swěta sobu wzał. Nětko pak móža wšitcy z pomocu wóndano wot Ludoweho­ nakładnistwa Domowina wudateje knihi Z Francom po swěće tež serbsce­ z Chróšćanom pućować.