Aus der aktuellen Ausgabe vom Montag, 22 Januar 2018

Čerstwe stopy w sněze su policistow w Kielu direktnje k schowej dweju pa­duchow wjedli. Mužej běštaj so do hosćenca zadobyłoj a tam pjenježnu kasetu pokradnyłoj. Alarmowa připrawa wubudźi 38lětneho wobsedźerja hosćenca, kiž na to rozbite wokno wuhlada. Přiwołani zastojnicy wšak spóznachu při rozbitym woknje čerstwe stopy w sněze. Dyrbjachu je tuž jenož přez wjacore dróhi hač k pincy jednoswójbneho domu slědować, a hižo paduchow z rubiznu mějachu: W kasy pak njebě ani dźesać eurow.

Ze spakosćenym mobilnym telefonom sam fotografował so je paduch w Berlinje. Do toho bě so do bydlenja zadobył, hdźež pokradny pjenjezy a handy. Mjeztym­ je policija internetny kontakt k handyjej nawjazała a wobrazy namakała. Nětko proša wo pokiwy, štó móhł to być.

Kajke to wuwiće! Předsyda SPD Martin Schulz bě ze sto procentami přihłoso­wanja nastupił, jako jeho loni w měrcu do zastojnstwa wuzwolichu. Na zjězdźe w Bonnje dyrbješe wón wčera zwěsćić, zo ma runje hišće 56 procentow delegatow za sobu. Předewšěm młodźi socialdemokraća běchu so wot njeho wotwobroćili. Při tym je Schulz we wěstej měrje tež tragiska figura: Sebjewědomje bě wón na wólbnym wječoru 24. septembra 2017 připowědźił, zo je wulka koalicija z CDU a CSU­ skónčena a zo so SPD do opozicije poda. Nětko dyrbi wón swoju stronu wo runje to nawopačnym přeswědčić, argumentujo ze „zamołwitosću za kraj“ a z hrožacymi nowowólbami. To drje njeje runje najzbožowniše wuchadźišćo, wo nowej wulkej koaliciji jednać. Njeby mje scyła dźiwało, zo so hladajo na zesłabjeneho Martina Schulza w SPD bórze za nowym předsydu rozhladuja. Marko Wjeńka

... mějach w dowolu w Španiskej zajimawu rozmołwu z młodym baskiskim porikom. Žona bydleše dlěši čas w Londonje a tež Lipsk dosć derje znaje. Na prašenje, što wo prócowanjach wo njewotwisnosć w swojej baskiskej domiznje dźeržitaj, dóstach njewočakowanu wotmołwu: „Tam angažuja so jenož ludźo, kotřiž kraj hišće ženje wopušćili njejsu.“ Wuprajena distanca młodeju Baskow mi dźensa wuwědomja, kak wažne je wobydlersku iniciatiwu Minority SafePack podpěrać. Etniske­ mjeńšiny trjebaja pomoc na europskej runinje. Jenož tale zhromadnosć móže kraje Europskeje unije wobwliwować, zo ze swojimi awtochtonymi mjeńšinami runohódnje wobchadźa.

Njewšědny jubilej su sobotu w Błótach swjećili: 125. Bórkowski młodźinski zapust. Cyłkownje 151 porikow poda so w dołhim ćahu po wsy, kotryž bě zas a zaso wot rejow­ přetorhnjeny. Zamołwići běchu wšitkich wobydlerjow a ludźi z Bórkowskimi korjenjemi na zhromadny swjedźenski ćah přeprosyli. Na čole dźěchu najmłódši, přizamknychu so młodostni z podpěru staršich, cyle na kóncu dźědojo, wowki a mnozy­ přećeljo. Foto: Peter Becker

Hač do kónca hodowneho časa drje je hišće trochu chwile, něchtóžkuli pak je swój božodźěsćowy štomik hižo zrumował. W Dobrošicach­ běchu minjeny pjatk mjez prěnimi, kotřiž su lětsa swoje hodowne štomiki zhromadnje spalili. Při horcym winje a poslednich hodownych poprjančkach knježeše pola Schneiderec dobra nalada. W Dobrošicach je kóžde lěto druha swójba na rjedźe,­ tele tradicionelne zarjadowanje přihotować. Foto: Feliks Haza

Rakecy (JK/SN). Financny zakład Rakečanskeje gmejny za nadawki w lěće 2018 je dosć dobry. Tole rjekny nawodnica financneho wotrjada gmejny Franziska Pfeiffer na zašłym posedźenju gmejnskeje rady, jako poda přehlad wo stawje financow kónc lěta 2017. W tym zwisku pokaza wona na to, zo pjenježny zakład hižo tak wobšěrny njeje kaž před lětom, přiwšěm steji gmejna na solidnym fundameće. Jedne z wažnych wuměnjenjow toho bě, zo je so z konsolidacije wudrapała.

Jako serbski klankodźiwadźelnik je wón swójske stawizny pisał: rodźeny Pozdečan Měrćin Krawc. Njedawno powědaše nam serbskim senioram Budyskeje tachantskeje wosady na měsačnym zetkanju wo swojich dožiwjenjach, kotrež měješe přez lětdźesatki na tymle wosebitym polu jewišćoweho wuměłstwa.

Klankodźiwadłowa sparta bu 1961 pod intendantom Jurjom Wuješom w Serbskim ludowym dźiwadle w Budyšinje załožena. „Mišter Krabat“ a „Ptači kwas“ słušeštej do prěnich inscenacijow. Kruhej awtorow přisłušeše tehdy předewšěm Hańža Bjeńšowa, pozdźišo tež Gerat Hendrich. Wjele serbskich a němskich dźěći je tele předstajenja rady wopyto­wało.

Pančicy-Kukow (SN). Klóšter Marijina hwězda w Pančicach-Kukowje zhladuje mjeztym na 770lětne stawizny. W septembru 2008 su w tamnišej klóšterskej cyrkwi we wobłuku swjatočnosće nowy Budyski wokrjes w swojej dźensnišej wulkosći a strukturje załožili.

Hižo dźewjeć lět přeprošatej konwent klóšterskich sotrow hromadźe z Budyskim wokrjesom na klóšterski­ a swójbny swjedźeń. Kóžde lěto njedźelu do swj. Jana přiwabja wón tysacy zajimcow. Dobra měšeńca wo­přijima duchowne, zabawne a kuli­nariske poskitki wopytowarjam kóždeje staroby. Towarstwa najwšelakorišeho razu, zwjazki a kulturne skupiny spožčeja swjedźenjej swój njezaměnliwy raz.

Přichod Hórnikečanskeho jězora w masterskim planje zapisany

Łaz (AK/SN). Přez cyłkowne saněrowanje přeměnjacy so Hórnikečanski jězor ma dołhodobnje wostać. Tole předwidźi na zašłym posedźenju Łazowskeje gmejnskeje rady předstajeny masterski plan. „Swobodny stat Sakska plan po 75 procentach spěchuje. Wón je nimale hotowy. Kónc februara ma doskónčna wersija předležeć“, praji regionalny manager Heiko Nowak ze zaměroweho zwjazka Łužiska jězorina gmejnskim radźićelam. Plan wotwažuje móžnosće wuwića. „To ma być zakład za předwidźane twarske projekty. Tuchwilu při Hórnikečanskim jězoru žane twarske dowolnosće njeeksistuja“, rozłoži Andreas Worbs z firmy STEG, kotraž plan zdźěłuje.

Žony, mužojo a młodostni su sobotu zhromadnje lětušu camprowansku sezonu w Ćisku zahajili. Mjez nimale 40 camprowarjemi běchu mjez wikingami a kosmonawtami tež tradicionalne postawy kaž saznik, jejkowa žona a štrusarjo. Posledni mjenowani kóžde lěto ćah nawjeduja a su za hłownu kasu zamołwići. Něšto lět je w Ćisku z wašnjom, zo so štrusarjam tež žona w serbskej drasće přidruža, zo by mjez splahomaj runoprawosć knježiła. Jako camprowarjo Gebauerec swójbu wopytachu, móžeše Anett Zahrodnikowa tuž Wolframa Gebauera do rejki prosyć, prjedy hač dachu­ so z kofejom a pomazkami pohosćić. Foto: Johann Tesche