Aus der aktuellen Ausgabe vom Mittwoch, 16 Januar 2019

Widźu-li dźěło wuhloweje komisije, kotraž ma wo kóncu zmilinjenja brunicy rozsudźić, čuju so trochu kaž w dźiwadle: Wšitcy napjeće na to čakaja, zo so spočatk februara zawěšk zběhnje a zo nam komisija plan strukturneje změny prezentuje. Potom trjebamy plan jenož hišće zwoprawdźić, a wšitko je přetrate. Hladajo na aktiwity politikarjow kaž na wčerawši wjeršk w kanclerskim zarjedźe pak njemóžu so zaćišća dowobarać, zo scyła žadyn plan nimaja. Přezjedni sej jeno su, zo budźe strukturna změna smjerć droha a zo njesmě so katastrofa wospjetować, kotraž je po znowazjednoćenju Němskeje cyłe kónčiny wuludniła, po tym zo běchu ćežkoindustriju bywšeje NDR bjez hnady a rozuma rozbili. Wotkel pak 10 000 dźěłowych městnow brać, hdyž budu brunicowe jamy a milinarnje raz zawrjene? Miliardy eurow žane dźěłowe městna njewutworja. Boju so, zo tež spočatk februara nichtó žadyn­ plan njezměje. Marko Wjeńka

W Budyšinje swjeći dźensa bywši direktor Budyskeho Serbskeho muzeja Tomasz Nawka­ 70. narodniny. Studowany etnologa bě serbsku instituciju wot lěta 1993 do 2014 nawjedował. Znaty je Nawka zdobom jako mnohostronski kulturnik. Tak njeje jenož hudźbnik, ale tež spěwar-basnik. Mnozy znaja jeho jako dudaka folklorneje skupiny Sprjewjan, kotruž bě lěta 1979 sobu załožił a z njej mnohe wustupy we a zwonka Łužicy zmištrował. Dale angažuje so Nawka we wjacorych towarstwach, kaž w Zwjazku serbskich wuměłcow, kotryž je sobu załožił. Tuž njejsu jemu dźensa jeno swójbni a přećeljo k jubilejej gratulowali, ale tež bywše kolegowki a bywši kolegojo­, kaž nětčiša direktorka Budyskeho Serbskeho muzeja Christina Boguszowa (naprawo) a dalši sobuwojowarjo serbskich towarstwow. Foto: SN/Hanka Šěnec

Praha (ČŽ/K/SN). Čěski ministerski pre­zident Andrej Babiš je wot póndźele w Aziji­. Hač do njedźele wopyta wón městostat­ Singapur, Thailandsku kaž tež Indisku. Ministerka za industriju Marta Nováková a delegacija 42 šefow wodźacych eksportnych firmow kraja jeho přewodźatej. Zaměrjene je Babišowe pućowanje do mjenowanych aziskich krajow hłownje na hospodarske a financne naležnosće. Wopyt Singapura zahaji čěski premier ze zetkanjom z prezidentku Halimahu­ Yacobu. Zetkał je so wón tež ze šefom knježerstwa Leejom Hsienom Loongom.

W Indiskej wobdźěli so na ekonomiskim forumje Vibrant Gujarat Global Summit. Přitomny budźe Babiš tež na swjatočnym wote­wrjenju twornje čěskeje towaršnosće Technocoat, w kotrejž budu plastowe poćehnjenja zhotowjeć, kaž tež noweho wuwićoweho centruma přede­wzaća Škoda Auto India.

Mjez wobdźělnikami lětušeho festiwala dźiwadła a reje „AufTAKT“ bě mjez druhim towarstwo Dance United – TanzSzene Budyšin­ (na wobrazu). Minjeny kónc tydźenja sobuskutkowacy z Němskeje a Pólskeje w starobje 14 do 27 lět program we wobłuku dźěłarničkow­ z profesionalnym přewodom nazwučowali a w Kamjentnym domje předstajili. Foto: Jörg Stephan

Radwor (SN/MkWj). Radwor zhladuje za dwě lěće na 800. róčnicu wobstaća. To je wjesnjanosta Wincenc Baberška (CDU) na wčerawšim posedźenju tamnišeje gmejnskeje rady wozjewił. Zakład toho su slědźenja muzejownicy, Radworčanki Andreje Pawlikoweje. Wědomostna sobudźěłaćerka Serbskeho muzeja w Bu­dyšinje bě w tachantskim archiwje wuslědźiła, zo bu Radwor 24. junija 1221 prěni króć w historiskim dokumenće Mišnjanskeho biskopstwa naspomnjeny. Tak maja Ra­dworčenjo składnosć rozmyslować, kak chcyli jubilej woswjećić.

Posedźenje gmejnskeje rady zahajił je wčera Radworčan Ludwig Sachsa z krótkim widejowym přinoškom wo dźěle šulerskeho­ dźěłoweho zjednoćenstwa „drjewo“. Hižo wjele lět šulerjo pod čestnohamtskim nawodom Ludwiga Sachsy drjewjane ławki twarja a po wšej gmejnje nastajeja. Wobrazy dokumentowachu, kak šulerjo z pomocu formy betonowe sćežory sami kidaja. Při kóždej ławce připrawjeja metalowu taflu, kotraž pokazuje, zo su woni ławku twarili.

Ratar z ćěłom a dušu, horliwy Serb a wěriwy­ křesćan z přeswědčenja Jurij Domanja­ swjeći dźensa w Kulowcu 80. narodniny. Mnozy, kotřiž jemu dźensa wutrobne zbožopřeća wuprajeja, so jemu­ tak zdobom za jeho stajne sprawne a njebojazne wustupowanje dźakuja.

Jubilar narodźi so 16. januara 1939 w Němcach. Z třomi bratrami a sotru je wón w serbskej ratarskej swójbje wot­rostł. Njeposrědnje po zakónčenju Druheje swětoweje wójny, z kotrejež so nan hižo z jendźelskeje wójnskeje jatby njenawróći, zastupi Jurij Domanja w ródnej wsy do šule. Derje dopomina so hišće na swoju wučerku Katu Brězanec, pola kotrejež mějachu wón a jeho sobušulerjo serbšćinu. Po 8. lětniku dźěłaše doma, hdźež mějachu dwanaćehektarske ratarstwo.

Zastojnikam hrozył

Wojerecy. Wjacori podružnicy Wojerowskeho bydlenskeho domu na Budyskej aleji su so póndźelu krótko do 23 hodź. pola policije hóršili, zo jedyn ze sobuwobydlerjow wótře hudźbu słucha a nócny měr myli. Na jich klepanje a klinkanje při bydlenskich durjach pak wón njereagowaše. Bórze na to stejachu policisća před bydlenjom 24lětneho a jeho napominachu, nócny měr druhich respektować. Po tym so młody muž najprjedy tež měješe. Lědma pak běchu policisća wot­jěli, dyrbjachu susodźa znowa harowanja dla na Wojerowskim rewěrje zazwonić. Nětko chcychu zastojnicy krućišo zakročić a sterejopřiprawu sćazać. To pak so 24lětnemu scyła njelubješe, tak zo so wón z kapsnej lampu do policistow da. Jenička móžna reakcija bě, alkoholizowaneho muža sputać a jeho sobu na policajski rewěr wzać. Tam pola njeho zwěsćichu, zo měješe 1,98 promilow alko­hola w kreji.

Za nadawki při Bjerwałdskim jězoru přemało zajimowanych firmow

Hamor (AK/SN). Po Bjerwałdskim jězoru jako najwjetšim Sakskeje ma dołho­dobnje pasažěrska łódź jězdźić. Gmejna Hamor­ a Łužiska a srjedźoněmska towaršnosć hórnistwoweho zarjadnistwa (LMBV) chcetej za to trěbne wuměnjenja wutworić. To podšmórny wjesnjanosta Achim Junker (CDU) zawčerawšim na posedźenju Hamorskeje gmejnskeje rady. Najprjedy ma mały přistaw na Hamorskim přibrjohu nastać. Hač do kónca meje ma tam wšitko hotowe być. Wo hišće njerozrisanych prašenjach chcedźa kónc januara ze wšitkimi wobdźělenymi partnerami na městnje rěčeć, kaž Junker připowědźi.

Berlin (SN). Serbowki a Serbja w Berlinje a wokolinje hotuja so po dlěšim času zaso­ raz na zhromadny serbski wječor w němskej stolicy. Kaž zdźěli Judit Šoł­ćina, wotměja jón krótko po ptačim kwasu srjedu, 30. januara, we 18 hodź. w Berlinskim zastupnistwje Sakskeje na Brüderstr. 11/12. Wobdźělnikow chce społnomócnjeny Sakskeje w Zwjazku Erhard Weimann powitać a jich do zastupnistwa wutrobnje přeproša. Dale je připrajił předsyda Domowiny Dawid Statnik. Zhromadnje z nim chcedźa tón dźeń we wólnej rozmołwje wo wšěm tym rěčeć, štož Serbam w stolicy na wutrobje leži. Snano móža so wopytowarjo tež wot ptačokwasnych­ chłóšćenkow překwapić dać, jeli hawron a sroka puć do Berlina namakatej.

Wjelelětnu wosadnu pedagogowku Karin Morgenroth (za mikrofonom při přednjesenju próstwow) su minjenu njedźelu w Halštrowskej cyrkwi na wuměnk rozžohnowali. „Sym lědma tajkeho wobstajneho čłowjeka zeznała kaž ju“, praji fararka Karin Großmann w prědowanju. Nimale 35 lět je Karin Morgenroth na cyrkwinskim polu skutkowała. Smječkečanscy wěriwi sej ju tohorunja waža. Za nich je wona měsačnje ekumeniske nabožne hodźiny organizowała. Serbske a němske dźěći, katolske a ewangelske,­ přežiwichu wjele lět wjesołe zhromadne hodźiny. Jako dźak su holcy a hólcy Smječkečanskeho dźěćaceho kruha knjenje Morgenroth hižo w Božej nocy přepodali mału drjewjanu serbsku klanku w burskej drasće, kotraž ma chlěb a sól na talerju. Foto: Diana Fryčec-Grimmigowa