Porik chinskich leopardow we Wojerowskim zwěrjencu bydli wot minjeneho tydźenja hromadźe.
Wojerecy (SN). Chinskej leopardaj San a BaoBao bydlitej wot minjeneho štwórtka hromadźe. Wo tym informuje Wojerowski zwěrjenc w nowinskej zdźělence. Z tym je nětko, po dołhim čakanju, před wjacorymi tydźenjemi zahajene hromaduwjedźenje rubježneju kóčkow zakónčene, a to wuspěšnje. Prěni raz po přichadźe do coowa bě žónka BaoBao nětko prěnje znamjenja so porować pokazowała. „Na to smy dołho čakali. Za móžne hromaduwjedźenje wobeju leopardow je to rozsudny aspekt. Bjez tajkich znamjenjow by to jara riskantne było. Wšako móhłoj so zwěrjeći mjez sobu zranić abo samo morić“, rozłožuje coologiski nawoda zwěrjenca Eugène Bruins.
Prěnički dorosta
Budyšin. Štóž rady čita, je sobotu, 26. oktobra, w Budyskej Dźěćacej a młodźinskej bibliotece na prawym městnje. Tam přeproša wšitkich zajimcow na dźeń wotewrjenych duri. Wopyt wudani so tež za přećelow paslenja a praktiskeho tworjenja. Nimo pokazki, kak móža dźěći dźeń bjez interneta a nowych medijow přežiwić, poskića tam dorostowi awtorojo swoje prěnje literarne wupłody. Biblioteka je wot 13 do 18 hodź. wotewrjena.
Na jubilejnej koncertaj
Choćebuz/Lipsk. Składnostnje swojeho 20lětneho wobstaća wuhotuje zhromadny dźěćacy chór Drježdźansko-Mišnjanskeho a Zhorjelskeho biskopstwa pjatk, 25. oktobra, w 17 hodź w Choćebuskej propstowskej cyrkwi a sobotu, 26. oktobra, w 19.15 hodź. na žurli Lipšćanskeje propstowskeje wosady jubilejnej koncertaj. W spěwnym cyłku je w běhu dweju lět tež tójšto serbskich dźěći sobu spěwało. Tak wjesela so akterojo wězo na dobre serbske wobdźělenje. Hižo hodźinu do sobotneho koncerta w Lipsku su wšitcy bywši čłonojo na přijeće prošeni.
ST 1922 Radwor
– ST Marijina hwězda 0:3 (0:2)
Zestawa domjacych: Grenzemann – Buša, Wjacławk, Jendrewski (90. A. Schulze), Wjeńka, Nuk, Rachela, Paška (55. Dźisławk), Glücklich (71. Hettasch), Pječak, T. Schulze
zestawa hosći: Hejduška – Wróbl, Bělk (58. P. Schmidt, 75. O. Schmidt), T. Jurš, Zelnak, Rab, R. Cyž (66. Lipič), Hawš, Šołta, Eldor, Ch. Cyž
W druhim wokrjesnym pokalnym kole zetkaštej so w Radworju wokrjesny ligist z Radworja a wokrjesny wyši ligist z Pančic-Kukowa. Wobaj cyłkaj dyrbještaj někotrych hrajerjow kompensować. Pola hosći falowaše na přikład Oskar Hawš, pola domjacych Stephan Reineke, Sandro Kral, Michael Bauer a hač do zymy je so tež Fabian Šěrak ćežkeho zranjenja dla wotzjewił.
Wolejbul, wobwodna liga žonow – wuchodna Sakska:
1. Koblicy-Ladykracher 3 9 :1 9
2. HZ Pančicy-Worklecy 3 9 :2 9
3. TSV Kundraćicy 3 5 :6 4
4. Doprědka Rothenburg 1 3 :1 3
5. Nysa Wolejs 2 3 :3 3
6. OSC Lubij 2 4 :5 2
7. Ochranowske wolejf. 3 3 :9 0
8. MSV Budyšin 04 II 2 0 :6 0
9. ST Kupoj-Nowa Łuka 1 0 :3 0
Prěnje zastupnistwo Hrajneho zjednoćenstwa Pančicy-Worklecy, kiž hraje we wobwodnej lize wuchodna Sakska, měješe sobotu tydźenja dypkowu hru w Rychbachu (Reichenbach). Po tym zo bě druhe zastupnistwo hižo dopołdnja wuspěšnje hrało a sej prěnje tři dypki sezony zawěsćiło, běchu hrajerki HZ Pančicy-Worklecy popołdnju na rjedźe.
Poprawom nochcyše so 46lětna Serbowka lětsa na kupje Hawaii wubědźować. Jeje wulki wuspěch spočatk julija w triatlonje na kanariskej kupje Lancarote w Atlantiskim oceanje, kiž přesahowaše kwalifikaciske žadanje za Hawaii wuznamnje, pak je wjedł k rozsudej, tydźenja pjaty raz tola na Hawaii startować, štož běše cyle prawje.
Wuběrnje je so tam znowa wubědźowała mjez nimale 2 500 starterami ze wšěch kontinentow swěta, mjez kotrymiž bě něhdźe dźesaćina profijow. Cyłkownje je 2 373 atletow, mjez nimi 651 žónskich starterkow, tele hoberske wužadanje zmištrowało. Mjez nimi běše 279 atletow z Němskeje. Wšitcy mějachu so z wysokej temperaturu, tužnotu, wětřikom, žołmami atd. chětro bědźić při płuwanju w oceanu (3,8 km), kolesowanju w bliskich horach (180 km) a w marathonowym běhu po skamjentnjenej lawje (42,195 km).
Freiburg (B/SN). Arcybiskop Freiburga Stephan Burger ma zrozumjenje za žadanje, žónske na měšnicy wuswjećić, njewidźi pak žanu móžnosć, cyrkwinskoprawniske předpisy změnić. Wón móže sej předstajić, zo „je frustrěrowace, hdyž je na zakładźe splaha přistup k tutomu powołanju zawrjeny“. Na wěcy samej njemóže arcybiskop ničo změnić, wón pak so za to zasadźuje, zo přińdźe wjace žónskich do nawjedowacych pozicijow.
Bamž dowola putnikowanja
Vatikan (B/SN). Bamž Franciskus dowola oficialne putniske jězby k marijanskemu hnadownemu městnu Medźugorje. Zdobom ma so tomu zadźěwać, zo so tole wułožuje jako připóznaće pozdatnych zjewjenjow, zdźěli Vatikan. Wo tutym městnje w Bosniskej-Hercegowinje bu prěni króć w lěće 1981 wo zjewjenjach rozprawjane. Hač do dźensnišeho so wizije wonych šěsć widźerjow dale posrědkuja a mnozy putnicy su so hižo nakazali. „Z Medźugorja wuchadźa wosebita hnada“, zdźěli Vatikan. Medźugorje je jedne z najwažnišich putniskich městnow swěta.
20 lět dušepastyr