Aus der aktuellen Ausgabe vom Mittwoch, 16 September 2020

Byrnjež měšćanske swjedźenje lětsa w Sakskej korony dla wupadnyć dyrbjeli, mějićeljo a wobhospodarjerjo karuselow tež w Hornjej Łužicy ze wšej mocu wo swoju eksistencu wojuja. Tak móžachu čłonojo Łužiskeho hermankarskeho zwjazka minjeny kónc tydźenja we Wojerowskim centralnym parku swoje nastroje natwarić a něhdźe tysac hosći witać. Foto: Gernot Menzel

Wojerecy (SiR/SN). Projekt „Pytać za slědami“ we Wojerecach zaběra so lětsa z wodomjetami (Springbrunnen). Mjeztym přewjeduja jón tam štwórty króć. Projekt młodym wobdźělnikam zmóžnja so intensiwnje ze swobodnje wolenej towaršnostnej temu bliže zaběrać a wuslědki zjawnje předstajić. Po prěnich lětach, jako steještej zašłosć NDR ze stawiznami a wuwićom šulow we Wojerecach kaž tež tema „Bjez rěče – Serbja w nacionalsocializmje“ w srjedźišću, maja lětsa hesło „Kupacy so we wodomjetach – dźěćatstwo w NDR“. Při tym hraje skrótšenka Hoywoj wosebitu rólu. Pismik „j“ z přełožka „Wojerecy“ ma symbolisce stać za dwurěčnosć města. Młodźi wobdźělnicy projekta, kotryž tamniša Kulturna fabrika (Kufa) pod nawodom Iny Züchner organizuje, rešeršuja, rozmołwjeja so z časowymi swědkami, zběraja nazhonjenja z nahrawanjom zwukow a wobrazow, a zhonja wo stawiznach města.

Zarjadniski zwjazk Při Klóšterskej wodźe so za region zasadźa

Worklecy (JK/SN). Zarjadniski zwjazk Při Klóšterskej wodźe je na swojim wčera­wšim posedźenju we Worklecach wažne wuhibki do přichoda čłonskich gmejnow stajił. Dnjowy porjad, kotryž mějachu radźićeljo wčera wotdźěłać, njebě runje krótki. Na kóncu posedźenja pak bě jasne, zo su wo přichodźe zwjazka a jemu přisłušacych gmejnow wažny rozsud tworili.

Budyšin. Maćica Serbska přeprosy swojich čłonow a swoje čłonki na hłownu a wólbnu zhromadźiznu, kotraž budźe sobotu, 26. septembra, w 14 hodź. na žurli Budyskeho Serbskeho domu. Towarstwowemu dźělej a wólbam noweho předsydstwa a předsydy přizamknje so wědomostny přednošk dr. Roberta Lorenca, kiž porěči wo Mukowej „Statistice łužiskich Serbow“, kaž zdźěli městopředsydka towarstwa dr. Anja Pohončowa. Přizjewjenje je trěbne hač do 23. septembra.

Z drogami po puću był

Běła Woda. Policija je póndźelu wječor pozdźe młodeho muža w Běłej Wodźe zadźeržała. Wón bě zastojnikam ducy na Schweigowej hasy napadnył. W titce měješe 19lětny pohłušenskej srědkaj marihuanu a crystal.

Křiž pokradnyli

Budyšin. Paduši su minjeny tydźeń na kěrchowje na Budyskej Lubijskej dróze železny křiž pokradnyli. 50 centimetrow wysoki symbol steješe tam wot 1940tych lět. Policija prosy swědkow wo pomoc.

Z nědyšim ratarskim žiwjenjom nazornje zeznajomili su so tele dny šulerjo 3. lětnika Slepjanskeje zakładneje šule na Šusterec statoku w Trjebinje. Holcy a hólcy, kiž zhromadnje po koncepće 2plus wuknu, tam z wulkej zahoritosću běrny zběrachu. Projekt bě wobstatk wěcneje wučby. Na te wašnje móžachu teoretisku wědu z praktiskimi nazhonjenjemi wudospołnić, wšako so tež we wučbje z běrnami zaběrachu. Wosebje za­jimawe za šulerjow bě, kak je historiska ratarska mašina, prosty křidowy wuhrjebowak, běrny ze zemje wukopowała. ­Nimo toho móžachu je sami z motyku wuhrjebać. Najwjetši dźěl składowachu w Lejnikec bróžni. Zbytk hnydom zwarichu a dachu sej je z twarohom a lanym wolijom k wobjedu zesłodźeć. Běrny tykali běchu nalěto ­čłonojo wjesneje Domowinskeje skupiny. Foto: Jost Schmidtchen

Łaz (AK/SN). Sakska gmejna Łaz chce 70 000 eurow lětušeje pawšale Swobodneho stata Sakska za sylnjenje wjesneho ruma wužiwać zaměrnje za Wulko­ždźarowsku Zakładnu šulu „Při Hórnikečanskim jězoru“ a za wjesne dźěle. To su gmejnscy radźićeljo wčera potwjerdźili. 50 000 eurow trjebaja za podruž kontejneroweje připrawy při šuli. Za šulerjow trěbny je narunanski twar, nutřkowneho wobnowjenja šulskeho domu dla. Za 15 wjesnych dźělow chce gmejna 20 000 eurow nałožić. Wobzamknjenje za wužiwanje pawšale bě trěbne, dokelž njeběchu so radźićeljo na swojim posedźenju 14. julija dojednać móhli.

Serbska cyrkej na Kamjentnej hasy w Budyšinje bu 1240 jako „Cyrkej našeje lubeje Knjenje na Selowych wikach“ dokumentarisce wobkrućena, mjeztym zo jeje spočatki do 11. lětstotka sahaja. Wot 1985 je wona jako filialny Boži dom tachantskej cyrkwi přirjadowana. Kermušu jako dźeń poswjećenja cyrkwje pak swjećachu minjenu njedźelu po dawnym wašnju.

Hižo někotre lěta wuhotuja w Budyskej Serbskej cyrkwi nimo kermušnych kemšow tež wosebity hudźbny nyšpor, lětsa tohorunja. „Dźakować mamy so Bohu za wšě dary a dobroty. Dźakować chcemy so runje tak wšěm, kotřiž so wo Boži dom staraja a so wo njón starosća“, rjekny tachantski farar, prelat Wito Sćapan. Wosadni so serbsce kaž němsce modlachu a spěwachu.