FC Energija Choćebuz
– 1. FC Lokomotiwa Lipsk 2:1 (1:0)
Zestawa domjacych: Spahić – Jäschke, Sváb, Stein, Baude, Putze, Viteritti (90.+2 Czyborra), Weidlich (90. Schlüter), Ziegenbein, Mamba (80. Nattermann), Förster
Na kóncu poslednjeje partije lěta běchu wšitcy w lěhwje FC Energije jara spokojom: koparjo, dokelž so jich wukon tež woprawdźe we wuslědku špihelowaše, a domjacy přiwisk z něhdźe 5 000 fanami, dokelž bě so njepřestajna podpěra z trawersow skónčnje wudaniła a tři dypki na konto zapisane. Samo stajnje kritiski trenar Claus-Dieter Wollitz je swoje mustwo hladajo na krutosć wole a bojowniski wukon chwalił.
Cyłk FCE bě prěni połčas absolutnje dominował. Kardinalny zmylk pak njehodźeše so wottřasć. Po jara dobrych nadběhach a po wobhladanjahódnym 1:0 (32.), z kotrymž Benjamin Förster swoje dźewjate wrota sezony třěli, nochcyše 2:0 padnyć. „To je bohužel naša słabosć, kotruž dyrbimy wotstronić, chcemy-li w tabulce Jenu hišće přesćahnyć“, rjekny kapitan Marc Stein po hrě.