Rakečanske ST – ST Radwor 4:1 (1:1)

Zestawa hosći: Wróbl – Omran, Šěrak, Henke, Zähr, Mark (85. Dawe), Bauer (70. Wjeńka), Rachela (90. Glücklich), Bejmak, Kurjat, Schulze

Po njezbožownym 1:1 minjeny ty­dźeń w Kulowje, dyrbjachu so Radworscy koparjo sobotu z Rakečanskimi kopa­rjemi měrić. Prěni raz wuzwoli Pětr Bejmak Fabiana Šěraka za kapitana, dokelž bě Paul Zimmermann po pjatej žołtej karće jenož přihladowar. Po zakopje njetraješe ani 180 sekundow a hižo wy­skachu domjacy. Feliks Hrjehor – hrajer serbskeje koparskeje wubranki – bě wótry­ róžk do šěsnatki přinjesł a Lorenz Pilz zhłójčkowa bul do saka. Nětko tež Ra­dworscy koparjo wotućichu, tola hra wotmě so jenož w połojcy hosći. Tući móžachu so jenož ze standardami strašnje Rakečanskim wrotam bližić. W 22. min. pósła Omran z dalokej přihrawku Toma Schulza, kotryž zwonkastejaceho wrotarja wuhra a na kóncu tola jenož wonkownu syć trjechi. Jenož mjeńšinu pozdźišo znowa standard za Radworskich. Róžk Kurjata wotwobara zadnje mustwo domjacych, tola Filip Mark za­pali bul ze 16 metrow do saka (23.). Po tym zwosta hra wurunana.