Po wuspěšnej sezonje, w kotrejž wubědźichu sej koparjo Sokoła Ralbicy/Hórki loni wicemišterstwo a wokrjesny pokal, přewza w lěću 2017 něhdyši profijowy kopar Jiří Krohmer delanske mustwo. Za 40lětneho čěskeho trenarja njebě to žadyn lochki nadawk, kročić po stopach Tomaša Henčla. Nětko, lěto pozdźišo, je so Krohmer hižo zaso rozžohnował. Čehodla a dokal je šoł, to přeradźa wón Jurjej Bjeńšej.
Knježe Krohmero, po jednym lěće jako trenar w Ralbicach sće swoju sportowu tobołu hižo zaso spakował. Čehodla?
J. Krohmer: Trenarjo dóstawaja kóžde lěto znowa poskitki druhich towarstwow. Tež pola mje tak bě, a sym sej wšitko derje přemyslił. Najbóle wabił bě mje hižo raz poskitk Budissy Budyšin, tam zhromadnje ze Steffenom Hoßmangom wěsty nadawk spjelnić, štož pak je na maličkosćach zwrěšćiło. Hižo dołho z Hoßmangom wo tym rěčimoj, zo budźemoj raz zhromadnje při liniji stać. Smój dźě spřećelenaj. Přichodnu sezonu nětko tak daloko je, budu jemu jako kotrenar w Ćisku poboku. Z ST Ćiskom je wón loni hakle postupił.
Što je Was tak wabiło, do Ćiska hić?
