Finale bičwolejbuloweje tury Radija Satkula
W Bobkec jěchanskej hali w Miłoćicach so wčera wječor mócnje kurješe. Tam pak njeskakachu kaž hewak konje přez zadźěwki. Dwaceći bičwolejbulowych cyłkow wojowaše při wysokim saku wo pokal Radija Satkula, kotrež je mjeztym tradicionalny turněr zhromadnje ze Serbskim Sokołom zarjadowało.
Wot napoł šesćich hromadźachu tam mustwa w štyrjoch staflach dypk po dypku, zo bychu so za štwórćfinale kwalifikowali. W stafli A poradźi so to cyle suwerenje teamej Mixery (něhdyši a tučasni hrajerjo Serbskeho gymnazija Budyšin) a po jeničkej poražce tež lońšemu finalistej Róžant. W stafli B běše cyle kuriozne: Team Satkula doby trójce a so tak jasnje skwalifikowa, dalše tři mustwa z dwěmaj dobyćomaj nadźijachu so na małe dypki, kotrež pomhachu skónčnje lońšemu dobyćerjej Handicap Pančicy. W dalšimaj skupinomaj přesadźichu so Nuknica, Škit Budyšin kaž tež Black Birds a cyłk ze spodźiwnym mjenom Volker Rachow z Worklec.