Michał Lorenc je dźiwadźelnik a zamóže genialne teksty pisać. Wo tym móžachu so wčera zajimcy na zarjadowanju w rjedźe Łužiske literarne dopołdnjo přeswědčić.
Budyšin (CS/SN). Prěnje zarjadowanje w lěće 2003 zahajeneho rjadu Łužiske literarne dopołdnjo, kotrež organizuje Němsko-Serbske ludowe dźiwadło Budyšin, je so w nowej hrajnej dobje hnydom derje započało. Zajim na wčerawšim čitanju Michała Lorenca składnostnje jeho 80. narodnin bě tak wulke, zo dyrbjachu je z mjeńšeje do wulkeje žurle Budyskeho Dźiwadła na hrodźe přepołožić. A tež ta bě skónčnje kopata połna.
W lěće 2003 bě Michał Lorenc rjad z čitanjom zahajił – w lěće, kotrež bě za njeho połne wosudow. Ćežkeje chorosće dla dyrbješe so aktiwny dźiwadźelnik na wuměnk podać. Kaž wón rozkładźe, nochcyše so zadwělowanju podać a spisa prěni z dweju dotal njewozjewjeneju tekstow „Kaspar Hanswurst auf Diplomatenjagd“, kotryž je wčera předčitał. Jedna so wo klankowe předstajenje, za kotrež je Lorenc sam figury stworił. Prjedy hač wón wčera z pomocu kolegow hru scenisce přednjese, je hišće dalši tekst z lěta 1983 čitał.